親民黨主席宋楚瑜最近四面楚歌，黨內要應付立委嘅出走潮，黨外則因為同陳水扁關係過於密切備受千夫所指。噚日由香江文化交流基金會主席江素惠主持嘅研討會，就變咗一場批宋大會。
立場偏藍嘅台灣大學政治學系教授張麟徵話，宋楚瑜雖然同國民黨主席連戰一樣，訪問大陸時風風光光，但呢個已經係佢「最後一道光環」。佢話「宋楚瑜反反覆覆，去年還講國親合併，今年一下又跳到民親（民進黨與親民黨）合作，看來泛藍整合都很困難。」
已同陳水扁反晒面嘅民進黨前立委沈富雄在場踢爆，話自己○○年到港時，特區政府都畀佢簽證，但今次卻百般刁難，噚日喺香港機場先攞到簽證。佢批評香港呢五年自由已經倒退，當事人可能怕佢喺香港會講啲唔妥當嘅言論。
在旁嘅江素惠就話，可能負責嘅港府官員唔記得沈富雄已經再唔係民進黨核心人物。咁都得？
傳真︰2623-9278
電郵︰[email protected]