今日對版之E3遊戲展b
雖然任天堂貼緊對手公布Revolution，可惜到E3正式開鑼後，整個展館均欠缺新主機蹤影，莫講話試玩，就連真身都冇得睇。大嘅冇影，惟有谷部細嘅；全場擺滿大量剛公布嘅GAMEBOYMicro（下簡GBM）任人試玩之外，重展出好多花款機殼，充滿潮氣，十足花生騷一樣目不暇給。
記者、攝影：許福合
基本規格表
體積：4"×2"×0.7"
重量：80g
屏幕：2"（具光暗調節）
運算能力：跟GBASP相若
機能：對應GBA遊戲、播放MP3功能
機迷點睇
今年任天堂展館位置跟往年一樣，全場有大量圖案及文字射燈周圍照，布置一如過往相當之Fantasy。雖然並未能搶先試玩新主機Revolution，不過現場都設有新Games試映室，如《薩爾達》新作等，可惜排隊人龍實在太長，難以逐一細看。
機闊4"全球最細
展區內，全屬NDS同新機GBM嘅天下，若論受歡迎程度，肯定係嬌小的骰嘅GBM！新機規格資料唔多，跟噚日報道過嘅一樣，多咗嘅係設有普通耳筒插孔，可播放MP3！其實簡單而言，GBM可算係GBASP嘅終極縮細版，拎上手感覺真係好細部，掛頸或攝喺牛仔褲袋都得，亞洲人會讚佢夠的骰，不過西方機迷可能反而嫌佢袖珍得滯。
GBM機能跟GBASP相若，對應遊戲亦一樣，當然唔對應NDS嘅Games啦。多咗聽MP3功能，插個普通HeadPhone就可聽歌，大可將佢當成一部細版SP，同當年GBPocket情況差不多。
玩舊Games畫面靚咗
既然咁多部GBM任試，當然唔放過搶先試玩嘅機會；場中擺放咗二十幾款Games，不過全部都係日本已推出嘅GBA遊戲，某啲美版Games改成英文介面，如《MarioTennisAdvance》等。實地試玩後，2"芒尚算睇得舒服，唔知係咪芒細關係，感覺畫面細緻咗同Sharp咗，而且設有室內、室外兩種光暗調節，所以無論任何環境都包保有最清晰影像。
GBM變面花殼
