是日恒指升0.5%，國指跑贏恒指，升幅1.1%。估計個市暫時仍係上落格局，恒指波幅一二百點，國指睇好少少，並由重磅國企帶動。國指昨日53點進帳中，中石化（386）佔咗9點。
中石化C輪4561：近排油價下跌，不利油股，但中石化有做石化產品生意，呢方面成本減番啲，着數番少少。中石化昨收3.025元，升兩格，估計仍有上升空間，可以買啲C輪短炒。
4561昨收19仙，只升0.5%，未有跟貼正股，隻輪9月28日夠鐘，溢價5.5%，槓桿率15.9倍（有效7.9倍），引伸波幅31%。差不多同時夠鐘嘅3862，輪價12.4仙，溢價6.6%，槓桿率24.4倍（有效9.9倍），引伸波幅27%。想搏殺啲，炒3862。
平保C輪2229：平保（2318）今日除息0.14元人民幣，昨升0.15元，收12.40元。
滙控（005）加碼，平保長遠睇好，股價跌落去都會上番，吼住回落之時，低位撈C輪，主角係2229。隻輪8月初夠鐘，輪價21.9仙，溢價1%，槓桿率5.7倍（有效4.8倍），引伸波幅42%。隻輪爆炸力普通，但勝在溢價幾乎最低，其他同類輪有啲溢價高到好高，買唔落手。
章盛