江欣慈自資六位數字的新唱片日內推出，她在唱片封套中以魔鬼天使混合體造型亮相，白色代表純真的小雀鳥，黑色則代表又妖又邪的黑貓，提到被取笑靠性感行騷籌錢出碟，她說：「講到我好似好陰功咁，不過我陰功得嚟好開心。」
江欣慈的全新大碟《黑白無常》將於日內推出，她自資六位數字出碟，不過早前出席泳衣騷時，卻被取笑是以性感行騷籌錢，對此江欣慈說：「講到我好似好陰功咁，不過我陰功得嚟好開心，其實行一個騷點夠出碟嘅錢呢，希望歌迷可以留意吓我啦。」
除衫除褲睇情況
今日下午六時半江欣慈將於觀塘apm商場舉行小型演唱會，她表示到時會有驚人表演，江欣慈笑說：「勁歌熱舞一定唔少得，其中有一part好似raveparty咁，串晒我上一隻碟嘅歌落去。」那麼她會否在活動中除衫？江欣慈說：「除衫咁普通，不如除褲啦，睇吓到時點情況啦。」
江欣慈在全新大碟封面中，將以黑白造型現身，她表示這代表了天使魔鬼的混合體，就像自己一樣擁有雙重性格，一時好陰沉，一時好親切，她說：「係有啲精神分裂㗎，白色代表純真嘅雀仔，黑色代表妖邪嘅黑貓，隻碟係雙封面，本來我諗住喺封套上面印『turnmeover』，意思係叫大家反轉都有嘢睇，但其他人話太淫賤，所以改咗做『pleaseturnover』。」
瑜伽動作好辛苦
江欣慈在其中一張照片中看似只得一隻腳，她透露是瑜伽動作，江欣慈說：「影相嗰日好攰，所有嘅靚相都係好辛苦先得嚟嘅，影咗八、九個鐘，啲衫係我搵朋友訂做嘅，釘咗唔少水晶。」
