余文樂將在下月四日舉行處男音樂會，他直言年前因負面新聞拖累而在台上被觀眾勁噓，此滑鐵盧至今陰影未除，加上擔心無人捧場，故令他近期大感壓力，只好藉玩電單車及向母傾訴來減壓。
余文樂於下月四日假九龍灣國際展貿中心舉行「熱火樂團音樂會」，由於這是他的處男騷，故對演出大感緊張及擔心，樂仔更直言壓力甚大，故近期才藉學玩電單車及向母親傾訴心事來紓緩壓力。
「呢排癲癲哋」
日前樂仔在何文田試駕一部價值約四萬九千元的PS250型號電單車時，他才重現歡顏，暫把煩惱棄一邊，當日他還巧遇路經的街坊兼老友杜汶澤，但杜汶澤卻抵死地說：「乜呢度變得咁雜嘅？」逗得樂仔大笑之餘，二人還即席在街頭交流車經。
及後樂仔再提到其音樂會時，心情隨即變得沉重起來，他說：「好大壓力呀，呢排有啲癲癲哋，驚個騷做得唔好、歌唔知編排好唔好、驚表演失準、又驚冇人嚟睇。其實我夠時間綵排，但諗嘅嘢太多，啲人都驚我太大負擔。我兩個月前開始打波、健身練氣，今次要唱成二十幾首歌，我𠵱家每日起身都好似儍佬咁攞住個ipod開聲。」
向母訴心聲
樂仔坦言壓力大與年前演出時被觀眾喝倒采有關，他說：「以前試過一次喺台上被人噓，因為啲負面新聞囉，到今日我都有陰影，連踩上舞台嗰三級都好難，心情特別沉重，我每次演出都會諗番呢啲嘢，喺自信方面好有影響。我知道公司好照顧我，我唔知點樣報答佢哋，唯一係希望座無虛席、反應好，令身邊嘅同事有成功感，同佢哋交代到。對其他人嚟講，佢哋可能唔覺得係乜嘢大件事，但對我，所有嘢都係得來不易。」
樂仔表示除了駕車減壓外，向母傾吐心事也是他的減壓方法，樂仔說：「媽咪係我嘅傾訴對象，佢知我唔開心，就會過嚟住幾日陪我，佢喺屋企好有安全感，佢可以令我放鬆心情。」
採訪：朱倬誼
攝影：林德雄
髮型：Ben@HairCulture
服裝：XLARGE（牛仔褲為私伙）
電單車、頭盔及手套提供：燦基電單車有限公司
