陳浩民同佘詩曼至今拍拖三年，雖然佢兩個成日分開兩地，但正所謂小別勝新婚，佢哋唔單止感情發展穩定，重好識得爭取時間，趁喺外地拍劇時諗計拍拖。
陳浩民前日喺台灣宣傳台劇《煙花三月》，台灣女演員張鳳書劇中同陳浩民合演情侶，但戲外張鳳書就毫不留情大爆陳浩民私生活。
佢話嗰時喺北京拍攝《煙》劇期間，有日陳浩民突然神秘失蹤，助手搵咗佢大半日，結果搵到隔籬間酒店，至發現原來陳浩民同阿佘喺酒店幽會。
三年內不得結婚
張鳳書大爆當時阿佘咁啱喺北京開緊劇集《覆雨翻雲》，阿佘住嘅酒店喺正《煙》劇劇組所住嘅酒店隔籬，所以陳浩民間唔中就會忽然失蹤，走咗去同阿佘拍拖，張鳳書重取笑陳浩民失蹤原因咪就係趕住去「覆雨翻雲」囉。
陳浩民就話佢所簽嘅經理人合約中，有條文講明三年內不准結婚，暫時佢都唔會諗結婚呢個問題㗎啦，不過佢亦忍唔住大讚阿佘個性活潑同有朝氣。早排陳浩民形容阿佘係佢生死之交，其實佢哋又點止生死之交咁簡單呀！
古天樂康城獵影
古天樂去康城出席完《黑社會》宣傳之後，又飛去瑞士同巴黎做手表廣告宣傳，佢離開前喺康城街頭影相嗰陣時，見到有個日本留學生，喺地下畫咗瑪莉蓮夢露嘅肖像，古仔貪得意影咗張相叫對方照住嚟畫，留學生於是將古仔個樣畫喺瑪莉蓮夢露隔籬，有唔少遊人駐足欣賞，但古仔塊面就不時俾人踩到。
KylieMinogue演唱會退票
澳洲女歌手KylieMinogue患乳癌，原定下月二十三號舉行嘅香港演唱會已取消。主辦單位噚日公布退票方式，持票樂迷可以喺下個月二十二號前逢星期一至六上午十一點至下午七點，到灣仔會展售票處退錢，至於用信用卡買飛嘅樂迷，將於三十日內獲退回全數金額，詳情可致電31288288。
馮德倫黐實《星戰》之父
奧斯卡影帝奇雲史柏西（KevinSpacey）早幾日曾經帶埋馮德倫一齊遊船河，日前佢又帶咗馮德倫去《星球大戰》嘅晚會，當馮德倫見到偶像佐治魯卡斯（GeorgeLucas、右）嗰陣，就即刻好似小fans咁黐埋去，重邀請對方影相。馮德倫話當晚好特別，所有擺設都同電影有關，佢重逗留咗三小時至走㖭。
Twins炮製甜品展身手
身為護膚品牌BIOTHERM代言人嘅Twins，日前拍攝咗新一輯廣告，佢哋兩個大扮廚師，炮製甜品梳乎厘。Twins話佢哋平時工作好忙，根本冇時間入廚，所以呢次趁機大展身手，佢哋都顯得好興奮。為食嘅蔡卓妍（阿Sa）見到焗好後香噴噴嘅梳乎厘，重即刻想食。
