以享有大都會生活做市場推廣嘅西灣河嘉亨灣，恒基舊年開賣呢個樓盤時，宣傳攻勢強勁。
趁樓盤幾個月後就入伙，恒基近排又再催谷個盤。營業部總經理謝偉銓話，住客對會所愈嚟愈重視，嘉亨灣嘅會所，名為Club@Sea，有十三萬呎，設施七十幾項，用咗億五興建。
會所由國際出名嘅RAD建築設計公司負責，為咗令會所裏面嘅設計更新潮，最近額外用成一千萬，去北歐、比利時同埋荷蘭等，搜羅唔同大師設計嘅擺設，放喺會所內。
RAD董事陳喜漢話，香港係一個海港城市，都市人嚮往大都會時尚生活之外，好想有個休閒生活模式，所以就用咗類近郵輪海上旅程做主題，去設計嘉亨灣會所，有動有靜嘅設施，就係希望令到住戶身在多姿多采大都會中，享有悠閒嘅生活感覺。
何文田多估唔到價
樓價狂升，加埋加息，令到銀行最近都要收緊估價，好似何文田咁，聽利記余成偉講，嗰度舊樓估價唔足，情況最為嚴重。二十年樓齡以上，一般有一成差距，十年樓都有三到五巴仙。新樓算係ok，一般都只差百分之一至三左右。好似啱啱成交嘅君逸山高層C，作價三百七十六萬，銀行掹掹緊估到喳。
因為估價問題，搞到買賣兩邊都喺度拉鋸。反而發展商嘅貨尾單位就到價，搞到唔少買家，去咗買一手貨尾，所以，何文田今個月到目前為止，二手交投都係大約十五宗，比上個月同期減少一半。
太古廣場吹埃及風
早排，有科學家將埃及法老王圖坦卡門（Tutankhamun）嘅臉相還原，喺外國引起一陣埃及文化風。
一向放眼國際嘅太古公司，亦都將呢股風氣帶嚟香港，下個月一至十號，將會喺金鐘太古廣場GardenCourt，搞「PharaohsWeek」展覽，畀市民探索吓古埃及法老王嘅神秘故事。
個節目由國家地理（NationalGeographic）頻道主辦，屬於亞洲巡迴性質，而香港係首站，認真畀面。
六月一日會有個開幕儀式，請嚟國家地理駐會探險家札希哈瓦斯（ZahiHawass）博士主持，屆時會有埃及舞蹈表演睇㖭。
都會商場鬥煲韓劇
長江實業唔單止賣樓多花臣，搞商場都有噱頭，好似佢哋管理、但屬於置富產業旗下嘅紅磡都會商場，早輪長實話，嗰度出租率，係置富旗下幾個香港商場最低，所以要催谷吓。
呢排韓風大熱，長實喺個場舉行百五小時煲韓劇比賽，五十名入圍參賽者，下周五起，要喺都會商場設置嘅超闊銀幕，朝七晚十二咁，不停睇韓劇《女人天下》，連續九日，唔停咁睇完百二集為止，唔准瞌眼瞓。真係幾高難度，好在有韓國小姐河少英，同其他藝員紅星到場打氣。出線嘅煲劇天王或天后，有十五萬獎金。
Bentley幫海名軒造勢
臨海豪宅紅磡海名軒，樓價動輒成千萬，要推動買賣，長實與豪華房車品牌Bentley合作，喺物業內整咗個Bentley主題設計示範單位，叫做「BentleyHouse」。
長實營業經理梁焯鏗話，個單位花費成五百萬裝置，噚日開放畀公眾睇。
今日開賣十個十五至三十五樓單位，每呎萬二至一萬六千五百蚊，比起年初加價百分之三點五，年中前打算賣五十個單位，估計有十七億回籠。
雖然話加息，但佢認為，豪宅始終有投資者追捧，估計年中前，個樓盤有三成投資者入市。
電郵地址：[email protected]
