昨日先至講到奧瑪仕（959）帶傳媒到澳門兼夾有好消息公布，原來好消息就係旗下希臘神話回購股份，導致奧瑪仕持有希臘神話的權益由16％增至19.9％，雖然仍然係唔夠兩成，但就講明重有回購傾緊，可令奧瑪仕所持權益再增加。
消息有幾好？小初暫時唔識睇，但奧瑪仕昨日成交就明顯增加，股價最高見0.86元，在3點15分停牌前收0.81元，升3.85％，成交股數有7976萬股，金額6607萬元。
濠賭股除咗奧瑪仕有搞作外，澳門實德（487）亦公布增持澳門主題公園項目十六浦權益，由家陣嘅兩成幾增至三成幾，雖然話就話係主題公園，但入面一樣有賭場，而賭場內的貴賓廳據講重係由澳門實德負責營運，由於澳門實德大股東對經營賭廳有一定經驗，所以會有協同作用。
呢段消息若果在去年公布，肯定又炒到不亦樂乎，但家陣就好難講。
慕容小初