五月九日九龍交通大擠塞，藝術Ｂ自觀塘教完書，一駛架車去太子道，就立即身陷重圍，用咗四個半鐘頭先至返到屋企。塞得咁緊要，當然一肚氣，但佢講到塞車最辛苦之處，就係便急，急到滿頭大汗，幾乎「爆肚」，呢個時候先至明白曼谷人點解要在車內放置幾個膠袋。
咁谷住，自然搵政府高官鬧幾句，發洩吓。惡佬明同佢講：「香港嘅街道使用率，可講係高到百分之九十九，偶生意外，塞車難免。我哋做建築嘅，見到有棚架倒塌，大樹橫倒馬路上，有乜法子吖，鬧高官鬧兩句咪算囉，再鬧都冇意思。」
塞車係天氣之錯，意外之錯，制度之錯，與高官能力無關。惡佬明從啲三行判頭界（馬場周時碰到）聽到，棚架倒塌之時，政府中下級官員打電話叫人去善後，但冇講價錢（因佢唔話得事），又唔講以後有乜好處（講親就犯法），啲三行人士話：「去拆棚係唔使招標，價低者得呀？條數點計，邊個孭先？」中級官員完全唔識答，唔敢答。吱吱咗咗，最後有高人打電話嘞，先至有人去開工，但一出發就陷入車陣中，插翼難飛，於是大家咪塞囉、塞囉，慢慢嚟，時間會解決問題。
公務員早已懂得「程序為主，目標其次」嘅保命主旨，凡有事情，即使最緊急嘅，如果不合廉政守則、公務員程序，一於唔肯運用酌情權，以免惹禍上身。邊個先至夠膽用酌情權（譬如不需招標，立即叫人清理街頭）呀？咪就係有資格問責之人囉，佢唔親自講一句：「有事我孭」，其他官僚睬你都儍，顧住份長俸職位最緊要，故此惡佬明對藝術Ｂ講：「將就吓啦，將來都會有同樣事發生㗎，希望到時能夠以第一時間發布大塞車消息，阻止駕車人士駛車入死胡同啦。」