效力皇馬嘅葡萄牙翼鋒費高，前晚由馬德里飛去里斯本，一心捧母會場，點之反而見證士砵亭喺足協盃決賽，由贏變輸，眼白白睇住中央陸軍將獎盃帶返俄羅斯。
效力士砵亭十二年嘅費高，轉會到巴塞隆拿後大放異彩；其實費高都冇忘本，前晚去到士砵亭主場艾華拉迪球場，一心睇班師弟捧盃，點之士砵亭領先一球下輸番三球；費高賽後就苦笑話：「我相信葡萄牙同士砵亭球迷已經為球員感到驕傲。」
雖然士砵亭輸波同費高入場冇直接關係，但係費高人氣近排真係跌入谷底，皇馬連續兩年三大皆空，費高已經係罪人之一，新教練盧森保高直頭將佢放入雪櫃。費高又主動「𢱑撈」，剛剛入選國家隊世盃外圍賽大軍名單，不過係人都知葡萄牙視迪高、基斯坦奴呢班後起之秀做重心，費高喺國家隊地位都好有疑問；正所謂「人貴自知」，費高與其飛來飛去，都係落力啲練波好過，話晒季尾就俾皇馬「叮」走，搵定新東家好過啦。
有正選踢重諗做閒人梅森巴返母會博乜？
今季喺西甲聯馬德里體育會失寵，之後被外借到英超聯曼城即重生嘅荷蘭中場梅森巴；我求大俠以為佢喺曼城起碼踢正選，應該會有啲眷戀。點知佢表態話想喺借用合約完結後，返馬體會發展！人哋當日唔要你，𠵱家都會一樣，何必係都要返去做個可能連後備都冇份嘅閒人呢？
搵比利撐場想擦火花馬勒當拿做主持有計
球王馬勒當拿早排去皇馬訪問，好似好悠閒，而近日終搵到工，就係喺阿根廷電視台做talkshow主持，個節目叫《10號仔之夜》；佢準備請一班球壇名宿做嘉賓，包括比利。佢兩個以前選世紀球王都試過「單打」對方，唔知再碰頭會唔會「擦出火花」？真係令人期待。
賊入屋打劫走先報警林柏特冷靜抵讚
車路士中場林柏特嘅屋企喺日前被劫，唔見電腦、一部電視同兩部車。當時佢同有身孕嘅未婚妻都喺屋，好彩冇受傷；佢喺賊佬開車走先報警，夠晒冷靜。警方事後迅速拉咗疑犯，幫佢搵番財物。林柏特愈嚟愈紅，睇嚟唔淨止要加強屋企嘅保安系統，重要請埋保鑣至掂。
人氣急升壓奧尼爾獲迪球衣最熱賣
NBA熱火隊嘅二年生獲迪喺季後賽表現冇得頂，人氣即刻急升；呢位球星嘅球衣上個禮拜賣到滿堂紅，成為聯盟最熱賣球衣；原本喺常規賽，獲迪嘅隊友奧尼爾球衣最賣得，獲迪就排第九，但奧尼爾近排傷咗冇打，獲迪就時勢造英雄，所以話機會時時有，最緊要識把握。
逢周一至周五見報