梁詠琪（GiGi）入行十年，決定利用知名度回饋社會，她希望今年可以成立一個慈善基金，幫助更多有需要的人。
梁詠琪最近為內地服裝雜誌拍照，她剛度過二十九歲生日，屈指一算加入娛樂圈十年，GiGi日前選擇與家人、好友及一班舊同學舉行了一個私人派對慶祝生日。GiGi認為在這種特別日子可以與知己良朋共度，是賞心樂事，而且亦是一份難能可貴的生日禮物，她說：「朋友簡簡單單、開開心心咁食一餐飯，比乜嘢都重要。」
成名付出代價
在娛樂圈工作了十個年頭，GiGi經歷過喜怒哀樂，亦令自己對人生有不同的看法。GiGi回想入行的處女作是跟劉德華合作，她說：「十年前，當時我重係設計系嘅學生，一心只係諗住喺設計方面發展，有電影公司搵我演出，我諗住賺一筆錢，幫補學費開支。」可是之後就片約不斷，成為藝人，GiGi的私人空間亦愈來愈細，她一度感受到欠缺自由。
GiGi續說：「後來我慢慢發現，呢樣嘢係冇可能唔發生，我嘅工作愈多，就愈多人識我，甚至去到外國都會有人認得我。𠵱家我反而學識面對同接受，當街上有人叫我，我重會畀佢哋一個微笑㖭。」GiGi認為這是藝人應做的，食得鹹魚抵得渴，她說：「做藝人係要娛樂大家，畀觀眾開開心心，只要配合到，我都會盡力做，其實同fans握吓手，都唔係乜嘢難事，何樂而不為呢？」
攞獎認清方向
此外，GiGi希望利用自己的知名度服務社會，她說：「我都冇諗過自己會拎『香港十大傑出青年』獎，但呢個獎的確畀我好大嘅鼓勵，我亦選擇咗正確嘅方向。今年最想成立一個慈善基金，幫助更多有需要嘅人。」