呢兩日Game界認真熱鬧，SONY、微軟同任天堂三大勢力分別公布旗下新主機資料。由於截稿前E3遊戲展尚未開鑼，對應遊戲吸唔吸引尚屬未知之數，故今日話題集中講吓三部主機嘅外形同規格。
記者：徐影龍
消化完所有資料，對三間公司下一輪主機攻勢嘅部署，筆者有太多感想，實在不吐不快。首先係最先公布嘅微軟XBOX360，吸取過往教訓，新機由日本及美國著名Designer共同設計，純白色調兼縮細機身，的確令人眼前一亮，全球擊節讚賞！可惜新機規格冇驚喜，係咁意加快粒CPU、加大啲RAM同硬碟，完全欠缺前瞻性，搭多嚿無線手掣同對應HDTV/1080i都於事無補，最多只算係XBOX嘅改良版，除咗Live同《BlueDragon》、《FFXI》兩款日本Games外，再冇其他嘢值得期待，希望將來能真正顧及亞洲機迷市場，搵多啲有質素嘅遊戲公司合作做Games，好過花天文數字請堆明星出席畀面派對。
PS3機能三者之首
跟住係SONY嘅PS3，先鬧佢個外形設計，主機已算冇咁離譜，最多俾人話似大陸DVD機，不過個「香蕉」形手掣真係頂佢唔順，十足十回力鏢咁，見到都想「飛」出去，喺網上真係俾人插到阿媽都唔認得，絕對打爛SONY個至潮金漆招牌。冷靜一想，可能同震動功能嗰場官司有關啩！鬧完一輪，要讚嘅係PS3硬件規格，由Cell核心處理器、nVIDIA粒圖像晶片到RAMBUS嘅極速XDR記憶體，都令PS3科技領先所有對手，最正係對應埋真正HDTV嘅1080p及支援SACD播放，影音質素無可置疑！當然對應得1080p，由運算能力到BD-ROM容量，都相當之驚人，希望SONY能有效控制生產成本，將PS3賣價降低（如PSP般蝕住賣更無任歡迎），讓我等平民百姓享受吓高質影音效果吖。
任記新機似PS2
最後輪到任天堂嘅Revolution，硬件規格冇乜資料公布，暫時不予置評，講吓佢一反傳統個機身設計。全黑機加纖薄冇錯係幾靚仔，唔似GC咁玩具，不過睇埋橫直機身設計，重要加個Stand，嘩！好似瘦版PS2啫！較特別係透過上網，可下載任記過去經典遊戲，對Fans嚟講當懷舊都重Work，但試問有幾多人願意花錢花時間下載舊嘢玩呢？再者幾年前已經被PC嘅模擬器玩到盡，吸引力再度削弱。希望Revolution喺跟NDS互動上有較大搞作啦。