裕泰興董事總經理羅守耀，早排完成手頭上嘅賣樓工作後，就全情投入佢首次執導嘅處女作，《非常青春期》嘅拍攝工作，今日終於正式上畫。以往賣樓同中記時有合作，估唔到今次拍戲都一樣可以合作，事緣中記都係贊助商之一，噚日重合作，喺銅鑼灣搞試映會。
身為贊助商之一，喺套戲入面，間唔中都會有「中原」嘅標誌出現，包括係中記分行門口嘅場景，重有宣傳橫額，成套戲足足出現五次，真係好過賣廣告。不過，套戲主要喺長洲拍攝，唔知幾時開始，中記喺長洲掛咗咁多宣傳品？
噚日重有戲中一班青春演員出席試映會，包括吳日言、阮小儀、駱力煒等，為咗配合套戲主題，佢哋都攞埋細個嘅相，貼喺現場，亦唔少得中記幾位高層，執董陳永傑、董事王浩聰同李巍嘅少年玉照。
老外嘉雲臺置業
樓市升咗咁耐，唔少買家，包括外籍客，按捺不住，終於入市買樓。
屋之島歐志康話，渣甸山嘉雲臺四座高層A室，剛剛連車位以一千七百五十萬成交，單位千八呎，每呎九千六，屬於市價。買家係外籍客，重係首次置業㖭，諗住自住。
呢個外籍客，喺同區租住單位，最近想置業，睇咗幾日就扑槌。點解要揀呢區，因為仔女喺呢度返學，咁好自然唔想搬去外區。
至於原本嗰名業主，八六年以二百四十八萬一手購入，轉手勁賺一千五百萬，個單位升值六倍。
貝沙灣批建遭質疑
立法會議員翻舊帳，攞番早喺七十年代開始實施嘅薄扶林延期履行權出嚟，質問政府，點解話明限制唔再批出新發展，數碼港咁大個商住發展又例外，係咪唔公平？
房屋及規劃地政局局長孫明揚，翻查十幾二十年前紀錄，話早喺八五年，為解決貧苦大眾住屋需要，批出華貴邨公屋發展已有先例，數碼港都係因應特殊需要，為方便盡快喺本港建立資訊科技與資訊服務公司嘅策略集中地，薈萃專業人才先批出。
之不過，蘭西唔知點證明住貝沙灣嘅人，一定同資訊科技有關啫。
樓盤配套冇影有因
樓盤地契往往列明，要起啲乜嘢相關設施，但有時樓盤落成多年，都未見起配套嘅迹象。
立法會噚日就有議員問起，官員解畫，指發展商有時唔履行地契內附帶條款，原因係先決條件未達到，或配合興建嘅設施未展開。
好似深井海韻花園，規定要起條行人天橋，但要配合青山道改善工程，與碧堤半島嘅完工時間，所以要到○六年至可以起好。另外，灣仔胡忠大廈接駁天橋，就要等隔籬酒店換地安排完成至可以起，不過，呢個換地安排，到𠵱家仍然未有聲氣。
代理界盼入立法會
樓市暢旺，每個月物業買賣總值有幾百億，地產代理促成嘅比例唔低，加上近一年多，入行人數大增，地產代理業內五個商會，希望可以擴大影響力，噚日約見政制事務局局長林瑞麟，討論之前提出，爭取喺立法會功能組別中，增設地產代理行業一個議席。
五個商會係香港地產代理商總會、香港地產代理專業協會、地產代理聯會、新界地產代理商總會，以及香港專業地產顧問商會。
電郵地址：[email protected]