噚日起跑嘅金勞詹好積極拉票，不過佢啲立法會同事反應就好冷淡，泛聯盟石禮謙話會提名畀當奴，大嚿就彈佢話：「佢啲政綱重衰過參選區議會嘅政綱！」大班重話，肯定唔會提名金勞詹，如果金勞詹同李永達是但一個做特首，佢就即刻移民！（呢句台詞熟口熟面，不過冇人當真，胡應湘都講過長毛選到佢會走，𠵱家咪又坐喺香港！）
自由黨、民建聯同大狀黨就冇咁直接拒絕，都推說話要返去傾吓先決定。梁家傑就好唔明，點解詹培忠問啲選委嘅意向表，其中一欄係「不回覆」，如果你都唔打算覆，咁填呢張表做乜？係咪填畀自己睇呢？
怪唔之得金勞詹前日都要話：「有個爐喺度，啲鐵票變晒水！」金勞詹呢句精句真係語帶雙關。乜嘢爐咁勁，搞到金勞冇晒鐵票？梗係篤定自動當選嘅「當爐」啦！
傳真︰2623-9278
電郵︰[email protected]