BeamsBoy專門店將於後日正式開幕，行貨駕到，卻唔代表水貨要迴避！一眾水貨舖嚴陣以待，有舖頭即時冧價正面應戰，亦有舖頭以絕迹專門店的Crossover貨為主打攻其弱點。趁住行、水大戰一觸即發，睇好戲之餘記得博亂掃筍貨！
記者：馬慶武
攝影：陳智良、林栢鈞、馬慶武
水貨老闆：我哋賣得平！
水貨舖「朝日屋」老闆之一Angel睇過專門店的報道之後話：「呢啲行貨好似比較舊款，得啲Tee比較新，但都係幾個月前出的！而且定價唔算平，好似條牛仔短裙咁，我哋兩年前已經賣緊，重平過佢一百蚊，不過𠵱家已經斷貨，都可能有人想買番嘅！」
I.T：我哋賣經典！
BeamsBoy代理I.T回應：「BB的Monogram系列，唔可以話係舊款，只可以話係BB的經典款式！咁喺專門店裏面又點可以冇經典款嘅Products賣呢？另外一啲BeamsBoy嘅背心、短袖Tee都係今季最新款，有人話係舊款，可能因為佢哋喺日本BB今季Catalogue見過。BB專門店會不斷有最新款返貨，盡量同日本專門店睇齊，好似喺日本都有得賣嘅美國品牌Insight服飾，香港專門店都將會有得賣！」
水貨拆招一：主攻日本限定Crossover
「朝日屋」每個月都會入大量BeamsBoy新貨返港，現已打算轉攻Crossover貨：「呢類BB乘乜乘物的特別版係日本國內限定，專門店應該返唔到，但係又最多人鍾意喎！所以我哋入呢類貨必定繼續有潮友支持。」
心口有個乘
水貨拆招二：密密返新貨
Angel另一條抗衡水貨的方法係：「潮流呢家嘢最緊要快，有啲新貨着遲幾個月，都俾人話你Out啦！我哋有買手專門駐守日本，個個月都有大批水貨返嚟，最快可以上星期喺日本落地，我哋今個星期即有新貨！呢一招咁機動，大公司未必追得到！」
你冇我有全新貨
水貨拆招三：即時冧價益Fans
另一間水貨舖Footstep店長Vannis話：「雖然水貨、行貨有唔同市場，但我諗都會有啲影響，始終好多人鍾意去專門店買嘢。」的確，專門店地方大、貨量多，可以慢慢行睇到啱、試到盡。Vannis話會將一啲較多存貨的產品以優惠價發售，希望可以清晒舊貨之餘，回饋BeamsBoy水貨Fans，第時再嚟幫襯！
舊貨即冧快清倉
我撐水貨！
我Buy行貨！
潮星個個着
a﹒朝日屋（太子聯合廣場2樓121號舖?21916534）
b﹒Footstep（太子聯合廣場2樓144-145號舖?21916570）
c﹒V3（銅鑼灣地帶2樓221號舖?28816515）