快樂煮教：<br>倒瀉美祿變煮排骨細路快高長大

快樂煮教：
倒瀉美祿變煮排骨細路快高長大

有沒有想過小時候愛喝的美祿、好立克和阿華田，除了沖成飲料外，也可製成佳餚？用這些作材料煮排骨、蒸蛋、做果凍，味道又會如何？對於小朋友來說不但有益健康，還味道香濃，飯都食多碗，快高長大就話咁易啦！

記者：陳冰麗
攝影：陳盛臣
示範：銅鑼灣讀者冼太

小時候，最愛一日飲一杯美祿才返學，飽肚之餘又營養豐富，甜甜的朱古力味，再加牛奶，特別香滑，那種滋味至今仍念念不忘。可惜現在發育時期已過，進入了發福時間，不太需要高營養飲品，幸好讀者冼太鑽研出這個美祿排骨，讓我一再重溫昔日的滋味……

■咦，冇晒喇！媽咪你攞晒我杯美祿去煮餸呀？

原來冼太也愛飲美祿，每日一杯才覺安心，但以美祿煮排骨，全靠一次意外。「有次煮完餸，準備開飯，阿仔突然話要飲美祿，點知飲時唔小心跣手，把美祿倒正喺蒸熟嘅排骨上，惟有將錯就錯，美祿連排骨一齊食，發覺原來味道唔錯，甜甜哋，帶點美祿香。」

■冼太煮教

試咗三四罐美祿

錯有錯着，冼太決定研究這道美祿排骨，經過多次試驗、失敗、再試，前前後後用了三四罐美祿，才成功炮製出最Prefect的美祿排骨。
美祿煮排骨都可以，冼太就膽粗粗，嘗試好立克蒸蛋，又以阿華田做果凍，結果亦沒令她失望，連好友麥太亦大讚，最欣賞好立克蒸蛋，話未食已聞到陣陣香味，重話都會煮畀囡囡試。

美祿排骨

自製價：$41/4人份量

有料到：
一字排 5條
青、紅蘋果 各1個

調味料：
糖 1/3茶匙
鹽 1/2湯匙
雞蛋 1隻
美祿 3湯匙
油 少許

炸粉料：
生粉 5湯匙
美祿 3湯匙

煮教金句：
要排骨內外都有美祿香味，醃及炸時都要有美祿粉。而且先猛後慢火，排骨至香脆。

跟住做：
1.一字排洗淨，瀝乾水，斬件，加調味料醃約30分鐘。青、紅蘋果切粒，放淡鹽水內待用。

2.炸粉料拌勻，排骨逐件蘸上適量炸粉，放滾油內炸，校慢火，待炸至金黃香脆，取出瀝乾油。

3.取青、紅蘋果粒，與炸至香脆的排骨兜勻即可。

鄰家小孩語嫣
呢嚿排骨同媽咪平時整嘅好唔同，多咗啲甜甜哋，但幾好味。

好立克蒸蛋

自製價：$19/2人份量

有料到：
雞蛋 2隻
好立克 2湯匙
三文魚子 3-4湯匙

煮教金句：
滾水開溶好立克後要攤凍才加入蛋液內，隔去泡泡，蒸蛋才會滑嘟嘟！蒸熟後小心揭蓋免倒汗水流入蛋內。

跟住做：
1.先用滾水開勻好立克，待攤凍後，加入拂勻的蛋液內拌勻。

2.再加入約1碗水拌勻，撈去蛋面的泡泡。

3.煲滾適量水，隔水將蛋蒸約8分鐘，取出，撒上三文魚子伴食。

好友麥太
唔係齋蒸蛋咁簡單，有陣香味，估唔到好立克都可以蒸蛋！

阿華田雜果凍

自製價：$15/4?人份量

有料到：
大菜 1包
阿華田 4湯匙
雜果 1小罐

煮教金句：
大菜邊煮邊攪，可防黐底；滾水開溶阿華田，加入大菜內才不會起粒粒。

跟住做：
1.煲滾約5碗水，加入浸水的大菜，以慢火煮至溶。

2.阿華田以滾水開至溶，逐少加入大菜內拌勻。

3.雜果隔去汁後，分別取適量雜果放於杯內。

4.倒入適量大菜，攤凍放雪櫃，雪至凝固，食時可伴以花奶進食。