新濠國際（200）昨日公布配股後復牌，結果跌穿批股價收場。小初心諗，連龍頭股都係咁反應，試問其他濠賭股又點會好過呢？睇嚟濠賭股炒風，一時三刻都難以重燃。
新濠今次以先舊後新方式，每股18.25元，配售7000萬股，集資12.775億元。雖然呢個配售價，已經較之前傳聞略低，但新濠噚日復牌，仍然最低見過16.95元，收17.70元，大跌8.76％，成交8240萬股，金額14.96億元。
經紀陳話，雖然新濠有壓力，而其他濠賭股亦乏善足陳，但仍然有人做嘢，好似奧瑪仕（959）咁，就會在今日帶傳媒到澳門一遊，據聞重話會有好消息公布。
奧瑪仕自從可換股債券屢遭行使令街貨激增，股價勁跌之後，已經有一段時間冇散戶夠膽沾手，就算佢哋有份嘅希臘神話好旺場，但奧瑪仕只得唔夠兩成權益，受惠有限，芬佬未必有興趣。昨跌1.3％，收0.78元。
慕容小初