上酒樓歎點心，蝦餃燒賣固然搶鏡，熱辣滑溜的腸粉亦老少咸宜，連未出牙仔的BB和老人家都吃得到，不過酒樓一般只有叉燒、牛肉、鮮蝦腸粉供應，再美味也嫌選擇少。最近九龍城新開一間腸粉專門店，全店提供25款腸粉，刁鑽到燒鵝腸粉都有，問你服未？
記者：謝翠玲 攝影：伍慶泉
食客有Say
店舖下午才營業，沒有早市，捧場客多數歎下午茶居多，阿健說：「九龍城乜嘢客都有，有人放工專登嚟買腸粉返屋企加餸，甚至有啲焗完桑拿嘅蒲友，買腸粉做消夜㗎！」說到最受歡迎的腸粉，非鵝肉腸粉莫屬。
6大必試推介人氣之選
秘製鵝肉腸$12
燒鵝肉連皮切粒做餡料，鵝油滲入粉皮，口感嫩滑帶惹味鵝香。
北菇雞絲腸$12
北菇滑雞飯就聽得多，北菇雞絲腸就真的聞所未聞，味道清淡勝在啖啖肉。
新鮮豬膶腸$10
豬膶一定要新鮮，蒸至剛熟的豬膶吃起來才會爽口，味道較一般餡料濃郁。
鮮蝦蝦米腸$12
鮮蝦腸粉由細吃到大，原來加細細粒的蝦米仔更香口，兩者配合味道超夾。
瑤柱菜苗腸$10
靚女KeepFit不想啖啖肉，不妨試這瑤柱跟菜苗的配搭，味道清淡不怕肥。
叉燒牛肉腸$12
無計！叉燒跟牛肉腸始終有死硬派捧場客，加起來做腸粉一啖試勻兩種口味。
腸粉種類多達25種
老闆阿健是點心師傅出身，入行13年，對各種點心製法相當熟練，惟對腸粉情有獨鍾：「嗰時啱啱做學師仔，見師傅左摺摺右摺摺，兩三下手勢就做出一條腸粉，真係好過癮！就係咁對腸粉好有興趣。」學滿師，開舖創業，順理成章開一家腸粉專門店，除大路牛肉、叉燒等餡料外，還有瑤柱、菜苗、北菇、榨菜肉絲等總共25種腸粉：「呢啲創新餡料我老早已經諗到，不過傳統酒樓啲師傅唔接納。」還好不接納，現在才得以成為他的獨家創意菜。
秘調粉漿粉皮爽滑
試過腸粉的顧客除被餡料吸引，更對爽滑粉皮讚不絕口，粉皮古老正統做法用白米磨成漿再蒸熟，現在大部份改用現成粘米粉調水開漿，阿健也不例外：「雖然我一樣用現成粘米粉，但重會加入生粉、粟粉和澄麵粉同油調配漿水比例，溝稀啲粉漿蒸出嚟嘅腸粉會比較爽滑，不過太稀腸粉又會好易爛，所以比例要拿揑得準，先做得出條條誘人白滑靚腸粉。」
熱辣腸粉逐格睇
滑溜溜腸粉一啖一條，吃，不用花你多少時間；但做，卻花阿健不少心機：
健一腸粉專門店（27169368）
地址：九龍城太子道西456至464號地下（舊機場對面）
營業時間：
星期一至五3:00pm至3:00am
星期六日12:00nn至3:00am
座位：25個
