眨吓眼，澳門金沙娛樂場已經開業一周年，噚日威尼斯人澳門管理層喺澳門搞咗個簡單而隆重嘅慶祝儀式，常務董事華年達同營運總裁麥輝霆一齊切「金沙娛樂場」蛋糕外（圖），重有八位同「金沙娛樂場」一齊生日嘅員工，每人都獲得高層頒發紀念品一份。為咗與眾同樂，兼多謝各位的士、旅遊巴士司機每日載一班班賭客嚟「進貢」，有關方面為佢哋送上清茶同紀念禮包。
諗起舊年今日，市場傳言金沙開幕派泥碼，搞到萬人空巷等入場，華年達話，舊年有成十萬人喺娛樂場出面排隊，雖然噚日一周年紀念已經冇咁墟冚嘅場面，但賭場嘅賭客冇大升亦冇大跌，總之穩步向上。佢重話，澳門金沙來港上市係佢個人願望，不過𠵱家要搞路氹嘅金光大道，冇時間搞其他，但佢故作神秘話一年後會有新消息公布。
劉碧思攝
傳真︰2623-9278
電郵︰[email protected]