由美國廣播公司（ABC）製作嘅電視劇《靚太唔易做》，喺美國播出後大受歡迎，雖然有傳五位靚太喺鏡頭前後經常爭風呷醋，不過佢哋前日喺紐約出席ABC節目巡禮時攬頭攬頸，不知幾friend。
兩女被杯葛
泰莉夏卓爾（TeriHatcher）、伊娃隆歌莉亞（EvaLongoria）、瑪茜亞歌絲（MarciaCross）、妮歌拉舒萊頓（NicolletteSheridan）以及菲莉絲蒂夏夫曼（FelicityHuffman）五位靚太，前日扮到靚一靚出席喺紐約舉行嘅節目巡禮，同ABC其他電視劇演員一齊會見傳媒，人氣高企嘅靚太自然成為眾人焦點。
其實《靚》劇播映以嚟，曾經多次傳出五位靚太喺戲內戲外乜都爭一餐，由戲服、出場次序以至對白多少都鬥個你死我活，其中第一主角泰莉夏卓爾同埋近日贏出《Maxim》雜誌最火辣女星嘅伊娃更加成為排斥對象，不過當日佢哋擺出一副好姊妹嘅姿態，重不時攬頭攬頸，實行以行動闢謠。
斥傳言無稽
泰莉早前接受雜誌訪問時就話傳言荒謬無稽，因為佢哋喺片場好friend，重不時大開派對，係真係假，相信只有當事人最清楚。
當日除咗一班靚太外，唔少ABC演員都有現身，好似有一段時間冇現身嘅希芙嘉咸（HeatherGraham）同埋近日轉戰電視嘅《酒佬日記》女星SandraOh都有出席，為佢哋嘅電視劇造勢。
