金融Ｋ睇左丁山講「BrainandLiven」，特登打電話嚟講：「唔好笑上海人串錯字，香港多得很。今時今日國內同胞學習英文之精神，香港學生?青年人應該學習，唔係嘅話，老本都冇埋，輸晒畀內地㗎嘞。我前星期北京公幹，某晚朋友帶我去一個叫做什剎海嘅地方，酒吧甚多，氣氛似足中環蘭桂坊，唔少外國人在此蒲吧，我哋入內坐低，我問侍應：有沒有minimumcharge？侍應聽唔明，冇答到，於是我立即講番：有沒有最低消費？佢話冇。
隔咗十幾分鐘，侍應行埋嚟問：先生，你剛才的英文字我不懂，請你寫下來給我學習好嗎？
於是我寫咗落張紙，附帶翻譯『最低消費』畀佢，佢要我教埋佢發音，講咗幾次，佢識嘞，就多謝我，重話：我每天學習一個英文字，一年下來，懂了三百六十五個字，很感謝您的幫忙和指導。
你話人哋幾好學呢，絕唔放過任何機會，你話我哋啲學生得閒會點呀？」
左丁山不禁衝口而出：「寫大字報反對大學國際化，反對增加英語教學。」金融Ｋ大笑：「咁都算斯文啫，我試過俾一個本地餐廳夥計擰轉面鬧：呢條友屎弗鬼，演英文呀，鬼×知道佢講乜×嘢咩！」
金融Ｋ作風十分香港，就係三四句說話就有幾個英文字，好多人以為佢英文叻，中文唔掂，其實睇錯晒，佢嘅中文十分耍家，如果報館的國際版翻譯要同金融Ｋ鬥快鬥好，將英文外電譯為中文，金融Ｋ未必會輸，因為佢讀中學大學之時，對語文科甚有興趣，曾苦心學習，以董橋為偶像也。