熱賣咗成個月嘅《任天狗》，依然狗氣旺盛，唔少舖頭都表示呢段時間嘅NDS好賣過PSP好多。而NDS下星期推出，闊別多年嘅《BOMBERMAN》，支援多人連線對戰，加上近排NDS嘅氣勢，絕對係NDS機主本月BestChoice，正式發售日係19號，不過坊間傳聞會有早貨返，希望到時唔會太貴。NDS緊接落嚟重有26日推出嘅高達系列《SDGUNDUMG-GENERATIONDS》，幾乎肯定又係必賣作，相信NDS嘅人氣仍可持續。
PSP行機嚴重缺貨
第一批PSP行貨自上月開始預訂，反應相當之理想，SONY慣例新機好反應就梗例牌缺貨！據代理消息，第二批要六月中先有貨返，心急玩除咗買水貨之外別無選擇。上星期爆咗PSP上網單料，家陣又有新進展，某寬頻供應商自第一炮公布咗申請上網送行機之後，繼續傾緊PSP上網計劃，不過仍停留喺初步階段，相信今年內都未必成事。
至於價錢一直高企嘅《FIFA足球》，上星期尾兩大批發失驚無神鬥價，市價跌到落$300有找！相信令唔少坐貨嘅Game舖損手爛腳。
PSP上的《CunterStrike》
KONAMI將推出PSP遊戲《CODEDARMS》，遊戲如《CunterStrike》第一身視點加《DOOM》形式打法，4人對戰就梗唔少得，上一款同類型遊戲《煉獄》嘅反應都算唔錯，相信呢隻亦有唔少捧場客。遊戲定喺6月23日推出，第一身射擊Fans要留意。
文：打機鐵人