「李嘉誠」三個字真係無處不在，想避都幾難，喺醫院又見到（包包威院嘅藥袋都有佢個大名），學校又見到。
話說香港大學日前獲得李嘉誠基金會捐款十億，為表謝意，港大校長徐立之同校務委員會主席馮國經噚日親身向佢講多謝，之後重特別開咗個記者會。
徐校長話，既然誠哥咁支持教育同醫療發展，為表感激之情，校務委員會決定將港大醫學院命名為「李嘉誠醫學院」，𠵱家等緊李生嘅回覆，睇吓佢老哥接唔接受。
不過，徐立之同馮國經都強調，將大學嘅學校以捐款者命名嘅做法喺外國好普遍，咁做並唔係賣名，但就唔排除其他學院日後都會照樣以捐款人命名，希望商界多啲捐錢畀大學發展高等教育咁話。
至於十億咁大筆錢會點使，校長話部份會畀醫學院，而醫學院代院長梁憲孫就會用筆錢喺教學、做研究，同埋請多啲人才。
傳真︰2623-9278
電郵︰[email protected]