煲呔同胡主席握手十一秒之後，周二已經返港，噚日重坐喺立法會為人口政策答辯，認真勤力。佢呢鋪可謂全情投入，不容有失。
煲呔去馬，原來服侍老董嘅舊班子亦陸續收工，首先係特首辦，繼麥國華返回新聞處總部，佢下面嘅MayChung鍾靄媚亦有高就，調咗去保安局做署理CIO，而原來位CIO梁潤芝就去咗做葉澍堃局長嘅新聞秘書，接替提早退休嘅MazyLee李蓬生。
八方問梁潤芝做局長新秘有乜唔同，佢話只係上班兩日，要時間熟習吓。至於Mazy，聽講人重喺香港，其實李蓬生早前已經想食瘦鴿餐退位讓賢，但係唔批，今次都算得償所願。
Mazy嘅家人都喺加拿大，佢當然想同家人團聚啦，八方都希望佢事事如意，其實Mazy嘅姐姐係一位好出名嘅大老倌，係任白嘅首徒，大概聰明嘅讀者都會猜到，唔使八方揭盅啦。
傳真︰2623-9278
電郵︰[email protected]