三司十一局中，嗌交最叻非「亞瑟王」李國章莫屬。早排八間大專院校趁政府搞大學四年制，乘機獅子開大口，向教統局叫價二百億加建教學設備。李國章噚日向八方一班行家簡報新學制時，直認自己都係獅子，佢做過中大校長，話如果𠵱家重係校長，就會開價三百億㖭。
不過佢之後好正經咁話，其實一向都有機制計算大學基建等撥款，計落只係需要增加三十幾億啫。
噚日教統局舉行「三三四」記者會期間，有位自稱來自YTV嘅「學生樣」女記者，問李國章關於職業導向問題。YTV係邊個電視台？據呢個小記者盧嬋清話，係佢哋學校一個校園電視台，而佢自己因為舊年成績唔好，所以去讀職業導向課程，噚日先至有機會做小記者，又強調自己唔係嚟「做媒」。
傳真︰2623-9278
電郵︰[email protected]