鄭中基（Ronald）日前俾周刊話佢當街又攬又咀女化妝師，前晚佢同張達明、李燦森同楊愛瑾（Miki）出席電影《龍咁威2》煞科宴，Ronald就捉住達明同李燦森話要案件重演，還自己清白，點知竟然所託非人！
話說Ronald搵達明做女化妝師，李燦森扮佢，Miki就扮當日俾Ronald以一百蚊使開嘅髮型師Horace。點知做到Ronald諗住走先，所以同化妝師來個臨別擁抱時，達明竟然不按指示，攬住李燦森係咁咀，激到Ronald猛叫停，好彩幾個百厭星最後都照Ronald意思做番次真實版。
同阿Sa情不變
事後Ronald話：「我好後悔叫達明做呢場戲，下次都係搵其他人做。」不過Ronald話咁緊張，唔係因為緋聞女友蔡卓妍（Sa）畀壓力，重話傳佢哋分手實在好無厘頭，佢哋由始至終「友情不變」。
Ronald之後報仇玩番李燦森，話說Miki當晚送小禮物畀每個演員，Ronald就呃李燦森話每個演員收到禮物後都錫Miki當「回禮」，李燦森信以為真，收禮物時就嘟起個嘴作狀錫Miki，Ronald就好得戚咁掩嘴偷笑。
李嘉慧噴甩三分一頭髮
李嘉慧噚日身穿低胸吊帶裝，去中環出席一間髮型用品店嘅開張活動。李嘉慧即場測試髮質，天生麗質嘅佢當然測試合格啦！佢話要擁有一把柔順健康嘅秀髮，一啲都唔容易，李嘉慧話：「我因為工作關係，成日要噴噴髮膠，最傷嗰陣甩咗成三分一頭髮，後來經過好好打理先冇事，所以女人想靚真係唔懶得。」
徐子珊談黎明扮失憶
早排有傳徐子珊喺日本拍廣告外景時同黎明撻着，所以飛起任職劇團製作經理嘅男友溫迪倫。噚晚徐子珊喺數碼港出席首映時，就話溫迪倫只係佢嘅普通朋友，同佢冇拍過拖，但當問到佢喺日本拍廣告時係咪上過黎明架車？佢就即時口窒窒，猛話唔記得，又話同黎明只係朋友喎。
鄧健泓借車位畀李詩韻
李詩韻同鄧健泓（Patrick）喺無綫新劇《老婆大人》中扮演情侶，近日有報道話李詩韻成日揸車去匡湖居探鄧健泓，重借用男方嘅車位，有時重會留夜㖭。李詩韻噚日喺電話度否認話：「我同Patrick冇嘢，我契媽都住嗰度，但佢冇車位，我先問Patrick借。」而身在上海嘅鄧健泓噚日亦喺電話度話：「我間屋個車位可以泊兩架車，李詩韻有個朋友住嗰度，得一個車位，我咪借個位佢泊囉，我哋只係朋友。」口供又幾夾喎！
徐小鳳錫錫殘障Fans
徐小鳳嘅《金光燦爛徐小鳳演唱會2005》門票今日公開發售，演唱會由七月二十三號至二十八號。有小鳳迷先幾日已喺紅館擔定櫈仔排隊。馮仁昭噚日同演唱會主辦單位負責人傾開，佢話喺紅隧入口買咗三個廣告位。而小鳳姐今次特登將小量輪椅位由四百蚊減至一百蚊，益吓殘障歌迷。
