本欄是勞工處與《蘋果日報》合辦，逢星期四刊出，旨在為勞資雙方解釋有關僱傭問題，如有任何疑問，可致電勞工處熱線：27171771查詢，此熱線會由政府熱線「1823」職員接聽。
黃老總：豈有此理！你睇，做少少事都唔掂，話極都唔聽，真係忍無可忍……李經理，你即刻幫我出封解僱信，我要炒咗研究開發部個梁主管，你叫佢聽日開始唔使返工！
李經理：但我同梁主管張僱傭合約寫明，炒佢要一個月前通知，或者要畀一個月代通知金至可以叫佢即時走㗎。
黃老總：無問題，佢做咗咁多年，我記得佢好似累積差不多一個月嘅年假未放，你叫佢聽日開始放埋啲年假，就當係通知期啦！
李經理：老總，咁做唔得㗎。根據《僱傭條例》規定，僱員享有嘅年假，係唔可以計算喺終止僱傭合約所需嘅通知期內。
黃老總：係咩？咁應該點做至唔違法？
李經理：如果要炒佢，我哋應該畀足通知期或代通知金，然後再另外畀番佢未曾享用嘅年假薪酬，同其他所有終止僱傭合約要畀嘅補償。
黃老總：嘩，乜咁麻煩？！
李經理：係呀！老總，其實梁主管呢次都係一時唔小心啫，不如俾多次機會佢啦！
黃老總：唉！見你都肯幫佢求情，好啦，就放佢一馬啦！不過你要提醒佢下次唔好再錯喇！
以上資料只用作說明《僱傭條例》下的相關條文，對有關法例的詮釋，應以《僱傭條例》原文為依據。如有任何爭議，則以法院的判決為最後依歸。
資料提供：勞工處勞資協商促進科
服務熱線
電話：29908288
傳真：23702192
電郵：[email protected]