車路士非法斟介阿仙奴後衞A高爾單嘢，英格蘭足總紀律委員會𠵱家重審緊，有冇罪就未知；不過國際足協會長白禮達就先大發偉論，要對有關球會作出重罰，好似禁止球會買賣球員一季，維持足球界公平。
如果白禮達呢個建議成真，最慘嘅未必係車仔，反而係一班喺球員轉會抽佣嘅經紀同球員經理人，話晒車仔都係轉會大客，閒閒地一季都用五、六千萬英鎊買新兵，抽兩三個佣都已經夠班經紀食過世，不過𠵱家隨時見財化水。另一班受害人就係吼住車仔「剩餘物資」嘅球會，好似AC想買斷基斯普、曼聯想簽古迪仙尼，車仔冇得補充新血，就只好焗住用番啲棄將，其他球會想執平貨就免問。
話時話，車仔單嘢其實同國際足協有咩關係呢？陰謀論睇，國際足協同歐洲足協一向唔妥，歐洲足協搞歐冠盃有聲有色，又搵到錢，白禮達唔眼紅就假，唔知佢會唔會想搞死其中一支歐洲班霸，等歐冠盃少啲叫座力都好。
貴過車神舒密加手臂阿祖安奴半月板天價
意大利《保險日報》綜合各保險公司嘅調查結果顯示，國米前鋒阿祖安奴對半月板最值錢（約一億五千萬港元），貴過F1車神舒密加對手臂；甚至著名男高音家巴伐洛堤把聲都唔夠「阿祖」矜貴。睇嚟皇馬同車路士想買佢嘅話，應該參考呢個調查再出個合理啲嘅報價喇！
未升班納比都話教拿玻里似費倫第2
今季由電影大亨入主嘅意丙拿玻里，家陣已經獲得升班附加賽資格，季前訂立嘅兩年升兩級目標又行近一步。隊波紅就多人吼，連意大利國家隊教練納比都話想將來離開國家隊後，可以重返呢間球會執教。講到好似拿玻里好快升番上甲組咁，唔怪得人人都話似第二隊費倫天拿囉。
告別戰後即醉酒鬧事獲加被鎖唔抵可憐
三十九歲嘅前英格蘭國腳兼森林後衞獲加日前踢完自己場告別戰兼袋走二十五萬鎊後，轉個頭就因醉酒鬧事而被捕，要佢前森林隊友、現任曼城領隊皮亞斯去保釋佢。與獲加同年代嘅加斯居尼同華度都因飲大兩杯而搞出事，所以我求大俠奉勸各位，酒可以飲，但千祈咪飲過龍。
話做齣好戲挫紅軍基斯普求借斷識做
AC米蘭嘅車路士借將前鋒基斯普話好想喺下個星期三嘅歐冠盃決賽贏利物浦，等佢有籌碼同車路士斟畀佢離隊。佢咁話：「車路士喺歐冠盃四強輸畀利物浦，如果我可以幫佢報到仇，斷估會畀我正式過檔AC。」既然佢都冇心留喺車仔，希望車仔可做個順水人情畀佢走。