「精英大師」卒之輸咗，唔能夠再創紀錄，好可惜。左丁山事前認為「精英大師」跑千六米有疑點，但對隻馬已生感情，照樣以佢行頭做膽，梗係冇錢收啦。「牛精福星」之贏，贏在巫斯義，賽前告東尼指示巫斯義（據巫斯義對《南華早報》嘅講法）係留住隻馬，入直路拉出外欄打衝鋒。呢個策騎指示應該冇錯，「牛精福星」嘅跑法，一向如此，上一季贏「勝威旺」就係咁樣跑法。呢隻馬係高雅志剋星，高雅志騎，「牛精福星」就失準；高雅志唔騎，佢就如猛虎出柙，贏高雅志嘅選騎。
呢次「牛精福星」排二檔，因「精英大師」放得太快，其他馬食塵，跟唔上，入直路轉彎之時，巫斯義違反策騎指示，守住內欄（因為馬排二檔），一見其他馬腳軟，就沿欄直追打衝鋒，結果終點前贏短馬頭位。如果巫斯義唔係藝高人膽大，隨機應變，違反告東尼指示嘅話，「牛精福星」一定會輸少少，淨係走外欄已經會蝕一兩個馬位啦。好多在場馬迷都話巫斯義係大賽騎師，名不虛傳。
人生冇話長勝嘅，「精英大師」輸咗，可以為馬主施雅治減壓。佢在香港大學讀書之時，身材瘦削，富翁Ｖ與佢同班，幾乎唔認得施雅治今天嘅肥大模樣。施雅治父親RemediosdaSilva係大狀，好養馬賭馬，據施雅治對《南華早報》記者講：「Hediedbroke」，輸得多之故也。故此施雅治好小心選擇練馬師，佢上隻馬「精明大師」本來唔曳，希斯訓練得幾好，贏過八、九場頭馬。買新馬之時，施雅治對馬販講：「買隻好過精明大師嘅。」結果嚟咗一隻ElMoxie之子，取名「精英大師」，告東尼太太同佢講：「你係葡萄牙人，東尼係葡萄牙人，你應該幫東尼。」於是隻馬就擺入告東尼馬房，創下馬場神話。
今年係西洋仔（葡人俗稱）年，施雅治、告東尼、摩連奴三人威到盡，都係西洋人。摩連奴一到英國，就幫車路士攞英超冠軍，更加成為葡萄牙民族英雄㖭。