由荷李活大導演佐治魯卡斯（GeorgeLucas）執導嘅《星球大戰前傳III黑帝君臨》，繼日前喺康城影展轟動首映後，一班幕前幕後嘅工作人員前晚移師至英國倫敦出席當地首映。雖然當日落住微雨，但都吸引咗五千幾個fans湧去里斯特廣場追星，有fans為親近偶像，兩日前已經去霸位，真係誇張。
兩日前霸定位
佐治魯卡斯前日同埋《星戰》系列嘅演員，好似凱頓基斯甸臣（HaydenChristensen）、伊雲麥葵格（EwanMcGregor）、基斯杜化李（ChristopherLee）同埋多位扮演機械人嘅英國演員齊齊行紅地氈，而日前曾現身康城嘅妮妲莉寶雯（NataliePortman）同森姆積遜（SamuelL.Jackson）因為有工作在身冇出席，但都無損fans熱情。
大會當日重安排咗英國皇家交響樂團現場演奏《星戰》音樂，襯托黑武士率軍隊出場，可謂氣勢十足。我羅拉重八到有影迷為咗見偶像一面，兩日前已經帶齊架生通宵喺紅地氈守候，不過有啲喺場外嘅fans投訴，話佐治魯卡斯同成班演員喺紅地氈上面稍作露面就入場，冇幫佢哋簽名，令佢哋有啲勞氣。
朗豪坊展珍藏
此外，為咗迎接《星戰前傳III》聽日喺英國上映，電影公司前日以二百五十英鎊（約三千五百港元）嘅門票舉行慈善放映會，一口氣播晒六部《星球大戰》系列電影，吸引咗約一千位影迷入場，挑戰睇戲嘅極限，佐治魯卡斯重突然入場同班超級fans問好，令佢哋個個都話值回票價。此外，一個名為「星戰華人網」嘅組織為迎接星戰熱潮，由今日起至星期日喺朗豪坊四樓搞咗個展覽會，展出星戰嘅珍貴收藏品。
《星戰III》聽日喺香港正式上映，易勝博又開出賭盤，《星戰III》上映開始連續七日成為票房冠軍嘅賠率有1.44倍，唔能夠連續一星期成為票房冠軍嘅賠率係2.5倍。