大學界最近「豬籠入水」，繼港大獲李超人捐贈十億元後，公開大學亦獲郭得勝基金捐出四千萬元，作為該校發展第二期校舍嘅部份資金。公大預計新教學樓最快可於○八年底啟用，到時面授課程學額可由目前嘅五百個，增至一千六百個。
新地副主席兼董事總經理郭炳江同郭炳聯噚日代表郭得勝基金，將捐款支票交畀公大校董會主席李業廣同校長梁智仁。郭炳聯話，父親郭得勝因戰亂而未能讀大學，不過佢喺投身社會後仍一邊工作、一邊自學，至五十歲先開始學習經營地產，成功創立新地。佢話其父信奉終身學習，同公大辦學理念相符，所以促成呢次捐款。
郭炳聯又話，該基金亦有捐款畀其他大學，但向來低調進行。被問及有冇設捐款上限，郭炳江就話會視乎項目而定，「十億唔係上限，要睇係啲乜項目。」
公大二期校舍將建於目前公大嘅停車用地上，項目需款一億七千萬元，約莫一個凱旋門天價單位多啲。其中一半資金會向政府免息貸款，另一半自行籌集。
爆料熱線：29290000、27860099
報料傳真：26239278
報料電郵：[email protected]