出晒名鍾意扮鬼扮馬、形象百變嘅長實執董趙國雄，平時賣樓，間唔中會用不同造型出席記招，襯番大會主題之餘，又可滿足吓表演慾。
長實噚日搞中半山菁英臺記招，試過唔同扮相嘅趙生，同營業經理曹皎明，一身學生哥裝扮之外，為咗突出主題，重上演一場話劇，夠晒生動。
飾演男學生阿Paul嘅趙生，同女同學Iris（曹洋名），透過話劇講出菁英臺賣點。之所以着一身校服，重有個St.Paul'sTerrace（菁英臺英文名）做校徽，無非想講樓盤喺正名校林立嘅中半山，樓盤對面就係著名嘅聖保羅男女中學，順理成章用嚟做樓盤個英文名。
個記招唔只生動，重好熱鬧，皆因四大代理高層同下屬，六七十人着齊白恤衫校服撐場，場內笑聲未停過，或者人人都鍾意時光倒流扮後生都未定。
星洲海濤苑沽八成
澳門金沙賭場開業後，刺激當地樓價急升，新加坡都決定起賭場，唔知係咪有相同效應呢？
美記過去三日假期，代理新加坡臨海住宅海濤苑二十八伙，售出八成，買家全部買嚟投資。美記張一輝估計，回報率達到五厘。
另外，新加坡遠東機構委託美記，代理中央城Central新世代商廈，實用面積每呎一千零五十（坡元，下同），入場費六十七萬八。
新加坡中心商業區商廈，舊年有二百七十一宗成交，比○三年增加逾倍，以五十萬至一百萬嘅單位最受歡迎。
港商濠江搵樓起
澳門政府雖然有意採取措施，壓抑炒風，但因當地樓市興旺，所以吸引唔少港人過江買樓，據聞，亦有承建商去嗰邊搵商機，新創建旗下嘅協興建築，就係其中一家，佢哋重攞到幾個項目嚟做㖭。
另外聽聞，本港一家規模唔細嘅上市英資公司，喺澳門都有地產發展項目。真係估唔到，澳門街豆腐膶咁細嘅地方，竟然「卧虎藏龍」。
點解會有咁多香港公司，去澳門尋找商機，原因係當地市場競爭冇本港咁劇烈，於是乎，攞到建築工程或者有發展項目，利潤相對可以比香港高啲。
不過，喺澳門街做承建工程，都唔係完全冇難度，最大嘅問題，係唔容易請到建築工人。
新地賣糭籌款
下個月十一號，係端午節，應節食品，梗係唔少得糭子。新鴻基地產旗下包括沙田新城市廣場、大埔超級城等七個商場，今個周末起，已經有糭賣。點解咁早，原來係慈善籌款活動，所得款項，扣除開支後，會捐畀「微笑行動中國基金」。
新鴻基地產鄺正煒話，會動員公司義工隊，協助義賣。呢個「糭有微笑義賣日」，上個禮拜六，由新地鄺正煒同郭婉儀、微笑行動中國基金主席鍾逸傑等，主持啟動儀式。
置業陷阱教你防
中記多個高層近排相繼出書，對手美記唔執輸，啱啱出咗本《精明物業租售個案實錄》，共三十個真實個案，踢爆置業陷阱，另附租售物業須注意事項，印三千本。
其實，美記「大學堂」之前都出過書，但主要係代理考牌天書，今次係實用系列頭炮。
美記搵咗新世界梁志堅與新地蘇仲強寫序，梁志堅話，代理係買賣雙方嘅橋樑，應與時並進，再唔能夠單靠「三寸不爛之舌」，必須專業知識與操守，又要有豐富知識，了解法律陷阱及各類問題。
蘇仲強話，物業資訊集中講價錢，反而買賣過程或應注意事項就少見，行內出書，可以填補缺口，提升買家對物業嘅認識。
電郵地址：[email protected]
