韓劇《大長今》全城熱爆，搞到無綫都嗱嗱聲安排重播，但無綫今次唔係安排喺明珠台播出，而係改喺無綫有份投資嘅收費頻道銀河衛視exTV度重播，而為咗幫exTV造勢，無綫重不惜重金禮聘飾演長今嘅李英愛，喺後日下午嚟香港，真係等到香港觀眾頸都長埋！
無綫全包宴
李英愛會喺香港逗留四日三夜，費用全部由TVB負責，噚日無綫外事部助理總經理曾醒明話TVB用天價請李英愛嚟，但所謂天價，係用誠意打動佢喎。李英愛為咗答謝香港觀眾對佢嘅支持，所以冇收取酬勞，而到時無綫會安排有份主唱《大》劇主題曲嘅陳慧琳同林保怡同李英愛見面。另一方面，佢喺《大長今》度嘅舊拍檔閔大人池珍熙，目前仍然喺上海拍緊陳可辛嘅新戲，馮仁昭見佢唔使埋位嗰陣成日攞相機出嚟影相，似乎對攝影好有興趣。
另外，承接《大》劇推出嘅《醫道》，上星期平均收視再跌兩點，剩番二十四點，即有一百五十七萬觀眾收睇，而宣萱同陳錦鴻主演嘅《老婆大人》，上星期首播，平均收視就已經有三十二點，即係二百一十萬觀眾捧場，成績相當唔錯。
Twins泳裝留倩影
女子組合Twins近日接咗一個廣告，佢哋會着泳衣上陣，Twins經理人霍汶希噚日喺電話度話：「佢哋呢次着泳衣拍廣告都好例外，不過都只係bratop配短褲仔，為咗效果靚，佢哋近排都開始節食同keepfit。」霍汶希重話今次批准Twins着泳裝，就當係畀佢哋青春留倩影喎。
舒淇準備十足飛康城
舒淇為主演嘅電影《美好的時光》去康城造勢，噚日特登由北京飛返香港，佢返到香港第一件事係先去睇醫生，因為佢喺前晚拍咗一場淋雨戲，佢驚自己會病，所以睇定醫生以防萬一，之後重去做facial、到Prada揀衫、同埋去中環整頭髮，跟住會合張震搭夜機去康城，舒淇重話如果有獎攞，一定會約晒所有朋友劈酒狂歡喎。
向海嵐冇Feel拒收勞力士
向海嵐噚日喺佐敦為一間金舖擔任剪綵嘉賓，老闆重送咗一條價值十幾萬嘅鑽石頸鏈畀佢㖭。向海嵐重話過往曾經有追求者追佢嗰陣想送勞力士名表畀佢，但佢唔鍾意對方同埋覺得隻表太貴，所以拒絕咗人哋嘅好意。
曾志偉為演協開班授徒
演藝人協會花咗二百六十幾萬喺觀塘買咗個會址，主席曾志偉同一班會員噚日就為新會址舉行拜神啟用儀式，志偉話今次已經用晒個會嘅資金，佢哋正構思緊舉辦演藝課程為協會搵番啲資金，佢話會員會教授演戲同埋開興趣班之餘，自己都會做客席教授喎。
