港股大跌，13800支持位終失守，恒指收13667，大跌199點。
早幾日講過，大市上到14000至14200水平遇阻，好正常，照計調整幅度唔會好大，但睇番啲C輪嘅表現，跌幅都大過正常水平，即係跌多咗，低成5%至10%，大戶肯平沽，即係佢哋好大可能推低個市，然後再低價買番。所以，13800若果守唔住，大戶真係會將個市篤番落13300至13500呢啲位。
外圍美股雖然大升，但大戶就借人民幣升值降溫的消息而造淡，其實，人民幣升值預期引發的熱錢流向，對股市影響心理大於實質，大戶要造好造淡，借題發揮而已。恒指噚日跌穿50日線（13757）同20日線（13816），短期反彈後會再試底。
宏安集團（1222）近期表現比大市強勢，由2元升上2.575元，噚日始趁大市急挫而進行調整，收2.40元，跌0.10元。
業績有改善
一隻股票的上升，供求係主要原因，另一就係業績嘅表現，以及股價是否明顯偏低。宏安發行股數僅1.43億股，市值亦只約3.5億元，雖然大股東持股不足20%，但有理由相信，餘下大部份股票都落在實力客手中，頗為惜售，所以，宏安一直都予人冷門股的形象，即使近期已累積了頗大的升幅，但貨源仍然唔多，就以噚日為例，成交亦只得45.3萬股而已。
至於業績，宏安亦有得憧憬。宏安本業係街市、商場同停車場管理，以及持有位元堂近30%權益，去年積極搞地產，剛好食正個大浪，賺大錢。05年度（3月年結）的上半年，盈利952萬元，中期後放售觀塘同旺角物業，獲利3000萬元，保守估計全年獲利4400萬元，每股獲利0.30元，PE只係8倍。
最吸引嘅係，去年9月底計數，宏安每股資產值4.73元，手擁的13萬方呎樓面，近半年又有可觀升值，照計每股實值已在5元過外，即使以折讓40%計，股價已可見3元。
宏安由今年開始，走勢形成大圓底，上月下旬突破圓底頂部阻力（2.325元），急升一段，然後出現後抽，回落到2.40元樓下，可趁低吸入，短線上升目標2.75元，中線可見3.20元。
郭兆誠