股價一直逆市而行的友力投資（674）再顯神通，昨日大市跌近200點，澳門賭業股又普遍腳仔軟，但友力就偏偏大升13.64％，收0.75元，成交股數5426萬股，金額3990萬元。
經紀陳話，江湖一直傳友力將進軍濠江，可能係收購酒店或者直接進軍賭業。公司喺上周進行批股，聽講街外人1股都分唔到，貨源悉數落入強者之手，所以友力股價全無阻力，要升就升，如入無人之境。
友力上周以先舊後新方式，每股0.60元，配售2.19億股，集資1.315億元，用作一般營運資金。對1隻三四線股仔嚟講，集資億幾銀唔係細，況且先前友力股價升咗咁多，理論上對股價應有一定壓力，但偏偏上周五復牌只係一度微跌，小初睇見都覺得奇。
不過，家陣濠賭股唔係咁好環境，就連龍頭股新濠（200）配股搞成點重未知，因此友力走勢雖然好強，但小初亦唔敢撲落去。
慕容小初