隔晚美股掂檔，港股不但冇跟住上，反而雞毛鴨血，恒指散199點，期指低水106點。滙控（005）今日除息1.09元，佔恒指39點，即係話期指實際低水67點。窩輪總成交28.57億元，佔全市總成交176.76億元嘅16.10%。有C輪在手者多過有P輪在手者，雖無統計數字，斷估窩輪炒家一日之內肯定夾埋唔見好多個億。
新地P輪4765：新地（016）發言人出面解釋，話前排凱旋門「天際屋」高價成交，唔係「打飛嘢」。如此聲明，唔係好少見，直頭係冇見過。新地收74.50元，跌1%，跑贏大市，冇大市跌咁多。
新地近期硬淨過大市，但個市底唔好，新地短期內有可能追番些少跌幅。暫時搞新地輪搵食，買P好過買C，對象係4765，10月初夠鐘，輪價31.5仙，溢價4.9%，槓桿率23.7倍（有效9.9倍），引伸波幅21%。揀短期對象，則向3678埋手，但呢隻交投少好多。個市波動，未必單邊發展，勢色唔妥，記得閃。
恒指C輪3717：恒指收13667，再跌若干，博反彈，揀恒指C輪做嘢，可以諗吓3717，下月尾到期，輪價8.2仙，溢價1.1%，槓桿率33.3倍（有效22倍），引伸波幅14%。隻輪爆炸力與殺傷力都好勁，落場玩嘢，記住諗埋風險因素。
章盛