馬田斯呢位國際米蘭「廉價勞工」終於扭計，年薪得四十萬鎊（約五百七十萬港元）、圍起周薪唔夠八千鎊嘅佢，要求年薪加到一百七十萬鎊。以佢今年表現絕對值得呢個價；同樣嚟自尼日利亞，耶高保以高價過檔米杜士堡，叫都唔使叫周薪三萬鎊以上無走雞，真係同人唔同命囉。
二十歲嘅馬田斯近季表現有目共睹，今季已經為國米省入二十一球，不過據講國米最多肯加到一百萬鎊年薪畀佢，都咪話唔孤寒。講質素，二十二歲嘅耶高保未必及得上馬田斯，至少佢未喺大球會證明過自己。佢日前以七百五十萬鎊轉會費投「米堡」，呢個價照計周薪坐底有三萬。有人話「米堡」位於東北生活枯燥乏味，所以會方通常比球員較優厚待遇。點講都好，馬田斯係被剝削嘅一位，造反有理！
英美月尾友賽試陣
鬥弱陣球迷咪鬼理
美國公布本月尾友賽英格蘭嘅大軍名單，幾個球星好似燕豪芬中場比士利同曼城中場雷拿都冇入選；英格蘭早前亦定出美國之旅人選，一樣弱到爆，啲球星好似林柏特、謝拉特同朗尼唔見晒。雖則球隊搵友賽試陣，但搵個球星睇吓都冇，對買飛入場嘅球迷好唔公平，唔踢好過。
話缺態實是秘密結婚
基斯普AC要沖喜？
AC米蘭前鋒基斯普最近明顯跌watt，禮拜作客萊切場波直頭冇跟隊。教練安察洛堤話佢身體狀況麻麻，但實情係三十而立嘅佢日前秘密同細八年嘅意大利大學生羅絲結婚。AC爭奪意甲幾成絕望，而基斯普前途又未卜，唔知經佢結婚沖喜後，隊波同佢會唔會轉好運呢？
翻𠝹前模特兒女友
朗拿度風流成性
朗拿度啱啱分手生活幾充實，呢幾日就以聯合國友善大使身份去以色列訪問。去之前話對於同施卡莉妮分手覺得好遺憾，但係一切都要向前看，果然一副風流浪子格！相信佢好快就會刮起「𠝹女」旋風！而我求大俠亦已收到風，佢已經極速「翻啅」前西班牙模特兒女友㖭。
澄清冇數AI獨食
韋伯最緊要爭氣
韋伯有個死黨向傳媒爆料，話韋伯大呻同艾華遜拍檔好冇癮，因為AI好獨食，重話寧願減薪都要離開76人。韋伯噚日急急澄清，話從來冇講過呢啲嘢，重話期望下季助76人爭標云云。其實韋伯𠵱家講乜都冇用，最緊要佢自己爭氣，下年打好啲波，否則就算肯減薪都冇人會要佢。