日本萬人迷木村拓哉近日認真黑仔，唔止新劇《Engine》收視未如理想，就連由佢打本畀父母經營嘅意大利餐廳LaBonita嘅其中一間分店亦宣布將會結業。
木村九七同九八年出錢畀父母分別喺東京世田谷區同埋川崎市經營兩間意大利餐廳LaBonita，當年木村人氣盛，餐廳吸引咗唔少木村fans慕名朝聖。可惜近年生意大不如前，其中世田谷區分店更加喺上月尾於餐廳網頁上宣布七月中結業。
另一方面，往日被稱為「日劇福將」嘅木村，新劇《Engine》收視亦係苦苦掙扎，套劇喺日本已經播出超過一個月，但收視只徘徊喺25%以下，同以往木村人氣全盛時期，經常超過30%以上收視相比，成績確實叫人擔心。
除咗唔少人批評套劇內容乏味同木村演技冇變化之外，重因為《Engine》故事發生喺一間兒童之家內，但木村喺劇中經常講埋一啲粗鄙嘅口頭禪，惹嚟唔少觀眾反感，認為有教壞細路之嫌，難怪喺早前由日本oricon所做嘅一個有關今季日劇滿足度調查入面，《Engine》只排第九名，輸畀由女星篠原涼子主演嘅日劇《anego》。