即將退休嘅滙豐亞太區主席艾爾敦，遊遍世界各地，對於一個城市應該提供點樣嘅設施，必定有啲心得。佢接任總商會主席一職就接受咗該會嘅《工商月報》訪問，佢話香港需要軟性嘅嘢，例如更多優質嘅藝術設施；另外重需要有其他東西吸引商人逗留。
以倫敦或紐約為例，商人去嗰度辦妥公事，總係會逗留番一排，享受嗰度豐富多樣嘅生活同娛樂。商人未必係購物狂，入夜佢哋都鍾意上劇院，睇話劇。喺香港，呢方面嘅活動並唔多。
佢又話，迪士尼樂園開幕之後，或者會吸引到商人帶埋屋企人嚟香港逗留幾日，商人傾生意，家人就到迪士尼玩，對香港經濟有好處。其實講時講，啲做生意嘅人成日要四圍飛應該係好辛苦嘅事，但艾爾敦就視之為一種學習經驗，各地有唔同嘅文化同人民，你可以從中不斷學習。
爆料熱線：29290000、27860099
報料傳真：26239278
報料電郵：[email protected]