香港窩輪市場全球最活躍，上周五成交金額23.84億元，佔大市成交額138.20億元嘅17.24%。有時所佔比例更達22%以上，最多人買賣嘅係恒指輪。
恒指C輪64隻，P輪66隻，兩類輪成交金額11.58億元，即係所有窩輪每成交100元，就有48.57元係恒指C輪與P輪所佔。可以睇見，日日炒上落，炒出炒入，非常多人。以0.25%佣計，炒恒指C輪P輪總共畀使費580萬元，計埋其他窩輪，一共畀千幾萬1日。有口痕友話，窩輪市場愈旺，炒家愈窮。
恒指P輪3704：大市短期偏淡，大市炒落着數過炒上，恒指短期P輪揀3704，6月尾夠鐘，輪價8.9仙，溢價1.9%，桿槓率34.6倍（有效19.6倍），引伸波幅16%。稍長期嘅揀3778，7月尾到期，輪價6.1仙，溢價3.9%，槓桿率51.7倍（有效19.4倍），引伸波幅16%。大市如果跌得勁，P輪則唔適宜高追。
恒指C輪4715：大市如果跌得急，則喺低位兜恒指C輪，對象係4715，9月尾夠鐘，輪價17.2仙，溢價2.9%，槓桿率20.7倍（有效12.2倍）引伸波幅16%。乜嘢叫做低位，臨場睇市勢可也。個市唔易賭，注碼要㩒住㩒住，未係狼嘅時候。
章盛