恭喜西布朗絕地反擊，成功護級，「細笠」終可吐一口烏氣；其實前晚英超聯幾場護級戰，睇到人好緊張；我求大俠無話幫邊隊，甚至覺得四隊都值得留低。但𠵱家西布朗神奇地跑贏其他對手，對國家隊嚟講其實未必係好事。
事關水晶宮嘅安迪莊臣及修咸頓嘅哥治，都係英格蘭國家隊前鋒線新希望，佢哋近來已先後成為大國腳，即使奧雲仔及朗尼等態沉時，都有後補人選；諾域治門將格連，更令到批評國家隊竟然搵唔到三個喺頂級聯賽球隊效力嘅門將嘅口痕友為之語塞。可惜，以上三位仁兄隨住前晚球隊確定要降班後，亦使國家隊喺嚟緊美國之旅，又要面對起用次級聯賽球隊球員嘅尷尬情況。
曼聯居功至偉？
西布朗成功留級，其實曼聯都有份出分力㗎；周前西布朗作客曼聯迫和一比一，我求大俠就唔信曼聯無放到水嘞；又難怪嘅，鬼叫西布朗領隊白賴仁笠臣同曼聯領隊費格遜老友咩！另外西布朗喺曼聯借入嘅李察臣前晚亦入咗一球，下半季亦為球隊付出唔少，都係護級功臣嚟㗎。
堅尼踩多腳無品
曼聯隊長堅尼早前接受亞洲傳媒訪問時話，最憎南下比賽，所以最想修咸頓降班。前晚佢雖然冇上陣對修咸頓，但賽後整咗個手勢話修咸頓抵降，搞到修咸頓球迷好嬲，差啲同佢起衝突，要在場人員護送下離場。修咸頓降班經已好慘，𠵱家堅尼重要過嚟抽水，真係有啲那個。
祖記眾將忽然好頭槌
祖記前晚憑迪比亞路同伊巴嘅兩個頭槌奠定勝局，再攞多兩分就攞硬聯賽冠軍；原來隊波近三場聯賽入嘅五球波，全部來自頭槌。其實祖記除咗查斯古特外，其他中前場球員頭槌都麻麻，勢估唔到最近居然一反常態；餘下兩輪嘅對手利禾奴同卡利亞里要小心提防。
科拿宴客累街坊
曼城前日對米堡，領隊皮亞斯臨尾出怪招，將六呎五吋嘅龍門占士推去打中鋒，搞到米堡防線亂晒，到補時重俾曼城博到十二碼，點知科拿勁射就俾門將舒華沙救出，粉碎曼城參加下屆足協盃嘅美夢；皮亞斯賽後力撐話下屆會繼續畀佢射，但科拿下季重可以留響度至算啦。