劉德華繼日前遭惡作劇話佢俾警察拉咗後，前晚又有事發生，不過今次係佢報警要拉人。話說華仔喺新戲《童夢》入面，由二十幾歲演到八十幾歲，重要化老妝演出。套戲上月底拍完，𠵱家做緊後期製作，年底先至上映，所以電影公司希望將華仔嘅造型保密。
點知早幾日有本雜誌竟然登咗華仔老妝嘅劇照，華仔方面大為震驚，重發現輯相係佢哋公司所有嘅，喺徹查緊係咪有人喺公司偷相之際，前晚竟然有人將輯相電郵畀各大傳媒。華仔公司發現後，即時發聲明，話輯相版權係佢哋公司所有，懷疑被人盜取咗，勸喻大家唔好刊登，重話佢哋已經報警，會保留一切法律追究權利。
華仔噚日話希望盡早搵到偷相嘅真兇。華仔一向最痛恨侵權行為，佢認為今次件事一定要嚴查同採取法律行動追究。
早排因為內地反日情緒高漲，所以有關方面唔畀搞大型嘅公眾集會，令原定上個月舉行嘅「西安成龍好朋友慈善演唱會」要取消。不過最近反日情緒放緩，呢個演唱會又可以開番，打算喺下月底舉行，不過𠵱家要等主辦單位同成龍同埋其他演出藝人度期後，先知確實日子。另外，劉德華八月尾亦會喺西安搞巡迴個唱。
原子鏸、劉浩龍和官恩娜噚日出席港台劇集《醫學神探》記者會，官恩娜喺劇中飾演護士，佢話：「我細細個都想做護士，今日我嚟試造型，本來以為着住護士制服會誘惑啲，點知套戲服足足大咗一個碼，搞到冇想像之中鬼咁誘惑喇！」
曾志偉噚日喺維園出席「保育大地植樹大行動暨佛光日足球友誼賽」，志偉表示稍後有意推出膠手圈以作慈善用途。對於電影《黑社會》因為畫面暴力，喺康城引起好大迴響，志偉話：「我未睇套戲，但如果外國人都話好勁，都應該好勁。」
徐若瑄噚日喺台灣宣傳「築夢踏實123」活動，佢呼籲大家唔好胡亂透支現金，浪費金錢，徐若瑄回想起以前住嘅舊屋，有老鼠跑嚟跑去之餘，瞓覺嗰陣又有蜘蛛爬上塊面度，每日重要食白飯撈醬油，諗起過去就好感慨，而因為試過捱窮，所以佢𠵱家雖然搵多咗錢，但就學會珍惜同理財。
