人民幣唔肯升值，美國佬反枱，宣布向三種中國紡織出口貨品，實施配額，今年下半年，大陸啲衣衫出口美國肯定急跌！
呢兩日，某位商界精英同八方講：壽爺「委任」當奴做特首，冇「委任」唐唐，今次老襯！
點解？因為唐唐同田少，家族都係做紡織生意，美國佬發爛渣，想鍊瓜大陸啲紡織品入口，最有切膚之痛嘅就係唐唐同田少呢一浸紡織生意上海幫！
若然畀唐唐同田少，是但一個做特首，咁今次美國玩嘢，唔使壽爺吹雞，唐唐做特首，田少做政務司司長，兩個都會自動埋位，對眼向住美國佬，流露出仇恨嘅光芒！
咁跟住話都冇咁快，就會以特首身份宣布，為報復美國政府欺負我偉大祖國、剝奪我國紡織廉價勞工嘅生計，特區亦向美國佬展開一連串懲罰措施：第一，麥當勞漢堡包（梗係叫「當勞」嘅第一個要開刀喇）要增加利得稅百分之一百；第二，荷李活電影入口特區亦要限制，定為每年十部，減少帝國主義向我炎黃子孫下一代洗腦放毒！
有上海幫紡織工業後代睇實個大局，呢，今時今日，特首咪可以即時捍衞到國家利益囉！所以千祈唔可以一本通書，猛話唔可以「商人治港」！睇吓邊一隻商人而已！航運商人趴咗街，紡織商人就得咧，美國佬咁樣搞，形同第二次共佢產（第一次就係佢伯爺逃離上海嘅慘痛回憶），佢同你死過呀！
畀着公務員治港，就唔同嘞！針冇拮過肉，佢永遠唔知痛，等收柯打，先至識做嘢，等得到中央落命令，蛇都死喇！
正所謂：聞鼙鼓而思良將，美國佬吼正大陸上海幫失勢，就郁你呢鋪，博壽爺佢唔識反應！早知係咁，擺唐唐田少喺度就得咧！咦，未遲個喎，因為重可以報名吖嘛！
爆料熱線：29290000、27860099
報料傳真：26239278
報料電郵：[email protected]