行街鄭在大陸搞戶外廣告，經驗老到。不久之前，佢返嚟香港，與左丁山小敍，講到廣告界新趨勢，話廣告公司將媒體分為HomeMedia（戶內媒體）與OutofHomeMedia（戶外媒體，簡稱OOH）兩大類，前者以電視為主，電台次之；後者傳統以大廈外牆、霓虹管（例如尖沙嘴、灣仔海旁大廈天台嘅廣告牌）、巴士、電車、的士、小巴、巴士站、地鐵站、電車站為主。因收音機老早可以隨身攜帶，手機都可以聽電台，故此電台既係戶內，亦係戶外廣告媒體。
之不過，未來最大嘅戶外媒體就係手機。手機先至係現代人一日親密接觸十六小時（算你睡覺八小時）嘅物件，世界級廣告界頭頭已認為一定要在手機賣廣告，先至可以與消費者全面接觸，電視已係昨日之事（試問強勢消費者每日幾多點鐘先至返到屋企睇電視？睇幾耐？《蘋果日報》係強勢消費者最愛，讀者實識答）。
不過我哋點會從手機睇到廣告呀？好似左丁山咁，除咗打電話，冇話睇實架手機㗎，點會睇到廣告呢？行街鄭話：「你呢類人好多，但中國有二億架手機，市場誘惑實在太大，唔諗計唔得。３Ｇ出現咗之後，就有多啲機會，譬如你用手機睇陶傑專欄，我可以在專欄欄目落個廣告啩！」呢句話冇錯，但廣告一定要簡短之極，好考撰稿人（copywriter）嘅功夫，廣告構思及創作夠晒挑戰性。
黑莓與筆記電腦亦係戶外媒體，一上網，一睇電郵，可能就會有廣告出現。諗諗吓，要搵人睇手機、黑莓廣告，首先要吸引讀者先，冇好內容（content），點吸引讀者呀！諗深一層，左丁山笑到出聲，發夢第日有好多讀者用手機睇左丁山，自己有機會收到廣告分帳，卒之有日龍穿鳳！