放完長假期，小初重拾心情炒股票。經紀黃話，不妨留意嘉域集團（186），雖然生產等離子同液晶體大電視愈賣愈平，但銷量就愈賣愈多，計落條數仍相當好賺，對公司前景有利。
嘉域以往業務瓣數多，常做公司醫生，財技精湛，比起好多投資銀行不遑多讓，但近年則專注電子產品生產，尤其係DVD機同等離子及液晶體電視生產業務擴展快速，公司生產線全部搬返大陸，生產成本低具競爭力。
嘉域截至去年底全年業績，盈利5.51億元，同比上升22.4%，現價往績PE6倍，息率4厘，睇落好吸引。
嘉域上周五冇起跌，收7.40元，成交稀疏，僅4.4萬股成交，金額32.3萬大元。小初覺得隻股成交咁細，實在係令投資者卻步的一個主要原因。但經紀黃就話呢樣嘢兩面睇，貨源集中則易炒高。
嘉域大股東喺3月份以每股7.20元減持2100萬股，係已發行股本的4.56%，套現1.5億元，擺明係有芬佬接貨，而批股至今，股價仍然硬淨，反映7.20元有支持力。
慕容小初