長洲搶包山，由於傳媒渲染宣傳，數以萬計市民湧去趁墟！飄色節目，有一個細蚊仔，扮演曾蔭權，唔知點解，係唔投入個角色，定係投入咗角色內心之後頂唔順，竟然大喊！搞到要大人畀汽水佢飲，先至識笑番！
曾蔭權爵士上北京，即將會見中國國家主席胡錦濤！飄色嗰個小童咁樣喊一喊，即是預警爵士上去，見到壽爺，八年來一腔冤屈，亦將會攬實壽爺，大喊特喊一場！
佢喊乜？喊八年來嘅委屈囉！想當年佢慘遭土共老左界定為港英餘孽，又歸類為陳方安生頭馬，郁一郁籮柚都俾人話佢向英倫肥彭發放緊秘密訊號，裏應外合，準備部署殖民地回朝！
索羅斯大鱷狙擊港元，廢董六神無主，爵士佢夥同肥龍，拉埋任志剛，一齊動用千億儲備堆沙包，再掟大石，十足套《天國驕雄》裏面耶路撒冷十字軍抗擊阿拉伯人嘅荷李活場面，點知就被人話佢喪心病狂，想散晒香港人啲血汗錢！
好嘞，擊退大鱷嘞，諗住論功行賞，點知廢董過兩年爭取「連任」，抗擊大鱷，自己攬上身，土共保皇黨大肆吹噓，連同所謂「成功落實一國兩制」，變為廢董嘅「十大功績」之一！「十大功績」，玩出一鑊五十萬人大遊行，江太祖執包袱，壽爺上任，咦，乜十大功績嘅大功臣，突然健康出現問題，對腳企唔穩喎，就咁碌咗落台！
其間，煲呔被罰揸住支掃把，留堂做清潔隊長！八年來，真係血淚一缸，等都等到廢董冧檔，撥亂反正，呢嗱！昔日嘅挺董親中保皇分子，紛紛變臉，力數廢董任內嘅禍港罪行，跟住就爭住攬曾啜權喎，套《大長今》終於大結局，你話身為局中人，今時今日，見到壽爺，係咪會激動到喊到收唔到掣呢？
喊喇，喊喇，親愛的小朋友，呢個係你與生俱來嘅權利！因為做飄色呢個節目，小朋友完全係受到大人擺布，畀支棍佢，踩到上高一高，環島大巡行，表面風光，查實套戲服裏面用鐵箍箍住，真係好辛苦㗎！
爆料熱線：29290000、27860099
報料傳真：26239278
報料電郵：[email protected]