一向有票房毒藥之稱嘅「籮霸」珍妮花洛庇絲（JenniferLopez），最近雖然備受綠色組織炮轟，指佢設計嘅時裝用大量皮草，重喺佢套新片《Monster-in-Law》首映禮度示威抗議，但似乎示威唔單止冇影響觀眾嘅入場意欲，反而幫佢手做埋宣傳㖭，齣戲上星期五喺全美三千四百幾間戲院公映，重以約八百萬美元（約六千二百四十萬港元）票房，成為單日票房冠軍。
其實籮霸套戲收得，相信要歸功於久休復出嘅兩屆金像影后珍芳達（JaneFonda），唔少影迷好希望再欣賞闊別影壇十五年嘅珍芳達喺銀幕上嘅風采。籮霸喺片中飾演珍芳達嘅準新抱，但珍芳達唔多滿意佢，重設法破壞佢同個仔之間嘅感情。
唔講唔知，其實呢個單日成績係籮霸從影以來個人最高開畫日票房，而根據呢個走勢，套戲重好大機會成為籮霸第一部喺首周開畫收過二千萬美元（約一億五千六百萬港元）嘅電影，皆因佢以往嘅電影成績慘不忍睹，佢同前男友班亞弗力（BenAffleck）主演嘅《愛情標錯心》票房差唔在講，更加俾影評人彈到一文不值。
而上星期五重有幾部新片開畫，其中由李連杰同金像男星摩根費曼（MorganFreeman）合演嘅《不死狗》，喺接近二千間戲院公映，結果以約三百八十萬美元（約三千萬港元）位列票房第三位，成績都算唔錯。