有錢佬陸陸續續高調挺曾，原來唔關中央聖旨，只係傳媒一手搞出嚟！𠵱個咁嘅邏輯嚟自行會成員陳智思。佢噚日喺港台節目《給香港的信》猛鬧傳媒，譬如佢話內地移民嚟香港減少咗，第二日啲人就攞呢樣嘢嚟問煲呔，煲呔就叫人生三個。第日啲傳媒個個做頭版，重話佢同煲呔預先夾定，此等生仔小事就咁就化大咗咁話。
然後輪到蔡菜子孖叉煲呔事件。陳智思話蔡菜子身為政治人物，咁老實講自己嘅感覺，應該值得尊敬，點知就俾傳媒批評英文差。佢重話，傳媒好鍾意問啲富豪，煲呔做得好唔好，人哋讚佢好自然，但你又大字標題話啲人挺曾，此為之自編自導喎。如此說來，八方如果話陳智思「猛鬧傳媒」應該都係誇大咗，因為佢老兄一定自以為只係有嗰句講嗰句，邊係鬧啫。
爆料熱線：29290000、27860099
報料傳真：26239278
報料電郵：[email protected]