笑話一則。某日，路人甲問救生員：「你救過多少個人？」救生員想一想：「無數個，其中有一個還成了我老婆。」路人甲一臉妒嫉：「不錯嘛！」救生員暗歎：「她的人生浮起來了，我的人生卻沉下去了。」《互聯網》
電視劇都有得做，兄弟檔拍住做生意，小則易生爭拗傷感情，大則反目成仇釀家變。今天說這個兄弟班，91年開始聯手在商場上打拼，96年設立JCShop門市大賣日本潮流精品，至今坐擁5間分店，生意愈做愈大。想當然的因財失義沒有出現，兄弟感情反而有增無減，何解？他們說是傳統潮州人的團結精神，老土？但最真。
記者：尹珊珊 攝影：周旭文
莊氏兄弟來自傳統家庭，有幾傳統？大哥Francis解畫：「我哋屋企係70年代舊思想嗰種家庭，食飯要叫『阿爸食飯、阿媽食飯』，起身要叫早晨。」剛踏入38歲的Francis，跟年齡最小的弟弟相差近7載，從小已自覺要做兄弟的榜樣：「可能我哋係潮州人，會特別有團結精神，覺得做大哥就有責任睇住班細佬，以前家住尖沙嘴，品流複雜，怕佢哋學壞，會管得好嚴。」三哥Chris點頭道：「阿爸開始老，大哥就做埋佢個角色，會叫我哋勤力讀書！」
嬲到震一刻
不過這個大哥也有做壞榜樣的時候，「我細細個開始食煙，搞到個個都跟住食，後來結婚有小朋友，自己戒煙後咪焗佢哋一齊戒，𠵱家四個都冇食啦。」
正因為Francis從小已是兄弟中的領導者，在公司也充當主腦。雖然Francis備受弟弟尊重，但他自言不會「一言堂」，抹煞兄弟的意見，「當初我決定開拓Fashion市場，特登搵Designer設計咗個Logo，歡天喜地同佢哋商量，點知Chris話驚客人以為係制服，Alan就直情話似煤氣公司賣牛仔褲，九唔搭八喎，嗰刻梗係嬲到震啦！」最後結果如何？大哥笑道：「咪等過兩日心平氣和，再慢慢游說佢哋囉！」
是兄弟是朋友
四兄弟當中，Francis、Chris和Alan生得如餅印般，身形胖胖壯壯，惟獨排行老二的Ray，面形較瘦削，更加因為不太相像，Ray和Francis曾鬧出同性戀疑雲，「試過有次到韓國旅行，可能我同Francis食飯時你試吓我嗰碟，我又食吓你嗰啲，班團友見到以為我哋搞基。」在旁的Francis即大笑：「我哋要拎埋身份證出來，先至有人信我哋係兩兄弟咋！」
Ray被兄弟評為「數口精，夠冷靜」，看其西裝骨骨打扮，似足精明生意人，但他自言小時極內向，「我的性格不及他們活潑。」性格使然，令Ray特別珍惜兄弟間的感情：「朋友同兄弟都係佢哋。」
大7分鐘做阿哥
Chris和Alan是雙生子，出生相差僅7分鐘，從小一起讀書、打架、長大，似足糖黐豆。不過相比將頭髮Gel起做龍珠頭，說話時動作多多無時停的Alan，Chris明顯較老成：「我話晒大7分鐘，點都係阿哥，可能我比較早婚，想法自然會成熟一點。」
Alan和Chris同樣健談，但對於這個看似長不大的孖生細佬，Chris卻另有看法：「佢咁活潑先至可以帶動屋企的氣氛，而且佢自信心好高，好似上電視節目介紹產品，Alan唔使背稿都可以發揮得好，我反而會怯場。」Chris讚完細佬都不忘自誇：「講到追女仔都係我醒啲，主動啲！」說罷自己也忍不住大笑。
最有代表性3選
4招保兄弟情
1.分工仔細地位均等
Alan：「因應每個人的性格及工作經驗分工，每個角色都同樣重要，無話邊個大晒。」
2.無隔夜仇
Francis：「有問題要主動提出，有爭拗即係有唔同意見，但拗完就算，唔好有隔夜仇。」
3.公私分明
Francis：「喺同事面前只會稱呼對方個名，唔會阿哥細佬咁叫，有錯一樣鬧。」
4.夠齊心
Alan：「我哋最大共通點係個個都重視工作，每兩星期先休息一日，全年最多放五日大假。」