不愧係球王級人馬！三十三歲嘅施丹（下個月二十三號生日）「老馬有火」，擒晚對西維爾一個「猛虎射球」，對方門將一眨眼個波已經擦楣底入咗；雖然個波幫唔到球隊贏波，但不失為一個金球。
賽事最終打成二比二，但係皇馬球員較以往落力咗不特止，重個個火氣十足：一開波卡路士飛鏟捷西斯拿華斯，補時階段希古拉又從後攔截達里奧施華被逐；若果今季全程保持咁嘅戰意，𠵱家就唔會以六分之差，提早將聯賽冠軍畀咗巴塞喇！
之不過，皇馬班球星年華老去亦係鐵一般事實，經常畀人「有心冇力」嘅感覺。我求大俠一直主張大換血，首先要叮走費高、卡路士、蘇拉利同森美爾，再重組後防線；最後買一個好嘅防守中場，咁就Good嘞！如果唔換血實聽釘。
重有一點，無論買咩球員都好，一定要「In」埋佢個老婆，睇吓係咪鍾意出風頭、同開Party。今季皇馬班人好明顯個心唔響球場度，而去晒咩訂婚、生日派對度；如果想下季翻身，呢樣嘢係咪可免則免呢！
馬加夫放水做人情？
史特加前晚喺德甲聯輸畀波琴後，雖重排喺第三，但比第四嘅柏林哈化同第五嘅雲達不來梅多分別一分同兩分，如果喺禮拜六嘅煞科煞科戰贏唔到已攞咗德甲聯冠軍嘅拜仁，隨時歐冠席位不保。
拜仁教練馬加夫之前教過史特加，唔知佢到時會唔會做順水人情呢？
姚明暑假不愁寂寞
火箭嘅中國籃球明星姚明早兩日放暑假，前日就即刻由侯斯頓飛去聖安東尼奧，探喺嗰度受訓兩周嘅中國女籃女友葉莉。之前姚明話呢個暑假會留係美國，咁當然要喺女友返國前爭取見面啦。雖然火箭喺季後賽出咗局，但安慰嘅係可以喺女友走前會面，暑假不愁寂寞嘞。
加斯居尼振作呀！
加斯居尼日前飛咗去美國，唔係去玩，又唔係去踢波；而係為咗令自己接受踢唔到職業足球呢個殘酷事實。我求大俠由細睇到佢大，見佢從成為國際級球星到潦倒都好心噏。
佢今次識得搵人幫我都好安慰，總好過酗酒麻醉自己嘛！希望佢重新來過啦！
德軍奇帥權柄受壓
德國隊教練奇連士文上任以來反對聲不絕，最近佢請個瑞士人負責搜集對手情報，點知俾國內傳媒批評，質疑點解要請個唔出名嘅。我求大俠就認為德國傳媒今次有啲多餘，話明係收料嘅，搵個人人都認得嘅，點收好料啊？另外，德國足總咁做都係唔想奇連士文勢力坐大啫。